Stamp khawlkhawm ho phochuak

Stamp khawlkhawm ho phochuak
Mizoram District Level Philatelic Exhibition – MIZOPEX 2026 chu Mizoram Postal Division bultumin Ningani khan Aizawlah neih a ni a. State chief information commissioner John Neihlaia’n a hawng a. Mizoram Journalists’ Association general secretary K Zothanpara chu khual zahawm a ni.
Tun tum hi Mizoram-a District Level Philatelic Exhibition vawi hnihna a ni a. Philatelist (stamp zirmi) Mizoram atangin 15 leh state pawn mi pakhatin an stamp collection an pho chhuak. Stamp pho chhuahte hi chanchin ngaihnawm tak tak nei, history-a thil tleng pawimawh, ram tana mi hlu leh tangkai stamp an ni a, culture leh heritage vawnhimna tha tak a ni tih sawi a ni. Mizote puala stamp awmchhun ‘Peace Accord’ stamp pawh pho zingah a tel.
He hunah hian Mizoram tihmingthatu, Mizo mipui rinawmna tilangtu pawimawh – ‘nghah loh dawr’ special cover (envelope) tlangzarh nghal a ni a. He hun denchhen hian, zirlai leh a duh apiang tan ‘stamp design’ siaka inel a ni a, lawmman siam a ni.