State a hlankai a nih leh ngei theih nan J&K CM in Delhi pan

Jammu & Kashmir a sorkar na chelh hlim Omar Abdullah kaihhruai sorkar chuan state a hlankai leh an nih ngei theih nan thuneitu sang an hmu dawn a, CM chuan ningani khan Delhi a thleng.
Sorkar-na an chelh hnua ram khawpui a tlawh hmasak ber tum niin, Abdullah chuan a cabinet in resolution an lo pass tawh chu prime minister hnenah hlanin, a sawipui dawn bawk a ni.
Assembly inthlanpui neih zo hlim J&K ah hian kum 10 chhunga a vawikhat nan Abdullah kaihhruai National Conference party hian seat 90 awmah seat 42 la in, Congress party nen thawkdun chungin sorkar na an siam a ni.
Cabinet thutkhawm hmasa ber chuan J&K chu state pui tlinga hlankai a nih leh ngei theih nan sorkar laipui ngen nise tih a lo pawm tawh a, an resolution hi Lt. Governor Manoj Sinha pawhin a lo pawm tawh bawk. Hemi bawhzui hian CM hian Delhi a thleng zui a ni.
J&K cabinet thutkhawm hmasak ber tum hian state nih an tul takzet thu hi nasa taka sawi niin, an ram chhunga chengte danglam bikna leh humhalhna kawng hrang hrangah hmalak bik a ngaih thin avang leh India peng pawimawh tak an nih avangin state nih chu an phu ngawih ngawih thu an sawichhuak hlawm.