State-a J&K hlankai hun tur sawi thei lo

Centre chuan Supreme Court hnenah eng hunah nge Union territory of Jammu and Kashmir chu State a hlankai leh a nih dawn a hun tak a sawi thei lo tiin a sawi.
Union government chuan Jammu and Kashmir chuan ‘eng hunah pawh’ inthlan a inpeih tawh tiin a sawi bawk a ni.
Chief Justice of India D.Y. Chandrachud kaihhruai Constitution Bench hmaah Solicitor general Tushar Mehta chuan Jammu and Kashmir Union Territory a dah chu ‘rei vak lo chhung atan chauh’ tiin a sawi a ni.
Mehta chuan a hmain August 2019-a Jammu and Kashmir then hran hnua State pek leh hun atan August 31 thleng hun pe turin a lo ngen tawh a. A hmaa State ni thin chu Union Territory pahnih Jammu and Kashmir leh Ladakh a then a ni a. Ladakh erawh Jammu and Kashmir ang lo takin Union Territory a ni chhunzawm zel thung ang tiin August 29 khan a lo sawi tawh bawk.
“Statehood pek leh hun tur tak ka sawi mai thei lo. Kum sawm tam State in harsatna a tawh avangin State puitlinga dah leh hun kan sawi thei mai lo va. Ka sawi chian theih chu Jammu and Kashmir State a dah leh tumin hma kan la mek a ni” tiin Mehta chuan a sawi.
Mehta chuan Jammu and Kashmir chu ‘dinhmun chhe tak avangin’ Union Territory ah dahin a awm tiin a sawi a. Statehood a nih leh theih nan investment a vur a ngai a ni a ti bawk a. Centre chuan Statehood a neih leh theih nan investment Rs 28,400 crore lai kalpui tur tiin tunah Rs 2,153 kalpui mekin a awm tawh a ti bawk.
Mehta chuan Jammu and Kashmir ah e-initiatives hmanga hmalakna chu kum 2018 a Rs 9,218 crore chu tunah chuan Rs 92,560 crore a kai tawh tiin a sawi bawk. Prime Minister’s Development Package hnuaiah infrastructural project 53 ah Rs 58,477 crore sengin 32 lai zawh felin a awm tawh tiin a sawi bawk.
Mehta chuan kum 2019 a Article 370 nuaibo a nih hnuah Jammu and Kashmir-ah inthlak danglam nasa takin a awm tawh a ti bawk a. Firfiakna, ram dang atanga lutru, lunga invawm avanga security personnel te hliam tawrhna chu 45.2%, 90.2%, 97.2% leh 65.9% in a tlahniam tawh a ni tiin a sawi bawk.
Kum 2018 khan inlak hran duh tena Jammu and Kahsmir a lung vawma chet lakna an neih avanga harsatna thleng 1,767 lai a awm a ti a. “Tunah chuan engmah a awm tawh lo. Kum 2018 khan organised bandh 52 a awm a, tunah chuan engmah a awm lo” tiin Solicitor General chuan a sawi bawk.
Petitioner aiawha ding Senior advocate Kapil Sibal chuan Mehta an Article 370 nuaibo hnua thil danglam thleng tam tak a awm a tih chu a hnial thung.
“House arrest in mi 5,000 chuang an dah tawh a, Section 144(curfew) State pumah puan a ni a. Engtiangin nge bandh a awm theih tehlul ang. Mipui ten damdawi In pawh an pan thei lo a nia. Court a thusawite hi public space anga ngaih a ni ta. Heng ngaihtuahna te hi television a pekchhuaha record vek a ni tawh a ni” tiin Sibal chuan a sawi a ni.
Chief Justice Chandrachud chuan heng figures te hi Centre in Jammu and Kashmir a statehood pek leh a tumna anga ngaih theih a ni a ti a. Article 370 nuaibo khinna hi Centre chuan constitutional ground in chhanna a pe tur a ni a, court a statistics hmangin a chhang tur a ni lo a ti bawk.
“August 2019 hnu lama sorkar in development work a kalpui tia sawi hi constitutional challenge thilah awm zia a nei lo. Nangi (sorkar) in min hrilh ang chuan State puitlinga hlangkai leh tur chuan hun a mamawh dawn in ti a. Tun dinhmunah development work kalpui mek a ni a, ngelnghehna thlen ngei a ngai a ni. Tunah Union territory atangin State a dah leh in tum mek a, mahse in dah theih hun tur bithliah in siam thei lo” tiin Chief Justice chuan Mehta hnenah a sawi zui bawk.
Hetihlai hian Mehta chuan Election Commission chuan inthlan a awm theih nan groundwork a nei mek tiin a sawi bawk.
“Vawiin thlengin voter list update kalpui mek a ni a. Tlemte chauh chinfel lohin a la awm a, Election Commission chuan hma a la mek a ni” tiin Mehta chuan a sawi bawk.
Mehta chuan Jammu and Kashmir-ah three-tier poll neih tur chu kum 2019 hnua a tumkhatna tur a ni a ti a, chu chu panchayats, municipality leh Assembly inthlan a ni dawn a ni.
Ladakh bikah chuan Mehta chuan Leh a inthlan chu neih fel tawh a ni a ti a. Kargil bik chu September ah neih a ni ang a ti bawk.