Channel hrang hrang tena Exit poll an lakah Meghalaya-ah sorkar siam thei khawpa chak an awm lovang an ti a, Nagaland-ah erawh BJP te thlawp NDPP ten chakna an chang dawn an ti thung. State pahnih te hi February 27 khan inthlangin chutih laiin Tripura-ah chuan party thar Tipra Motha te chu king-maker an ni dawn tih a ni bawk.
-- Advertisement --
Tripura
State lian lem lo mahse pawimawh tak Tripura-ah hian kum 2018 khan BJP te chuan mak tak maiin CPI(M) te namthlain thuneihna an chang a.
Kumin hain IndiaToday-MyAxis tena poll an lakah seat 60 awmnaah BJP te chuan seat 36-45 an lak rin a ni a, popular vote 45% vel an hui rin niin heta atam ber te hi phaizawl Bengali te chenna atanga an hui tura ngaih a ni.
Hei bakah hian Left-Congress tangrual te chuan popular vote 36% vel seat 6-11 vel an lak rin a ni a, chu chu kum 2018-a 43% vote hui lakah chuan tlem tak a ni a. Party thar Tipra Motha, Tripura royal hlui Pradyot Kishore Mankiya Debbarma kaihhruai chuan tribal area-ah seat 9-16 vel lai lain 20% vel vote a hui rin a ni bawk.
Mahse, Left-Congress tangrual te chuan exit poll lak chu an rin loh thu sawiin Congress leader Sudip Roy Burman chuan, “BJP te hian single digit chauh seat an la ang, mipui ten dan mumal lohna State nih an hne. Sorkar mek lakah phuba lak an duh,” tiin a sawi. Mahse, ETG-Times Now poll chuna BJP te chu party lian ber an la ni dawn tho tiin inthlan hmasaka seat 36 an lak atangin seat 24 bak an la lovang a ti thung a. Left-Congress te chuan seat 21 la ang tiin Tipra Motha te chuan tribal area-ah seat 14 an la ang a ti thung.
ZeeNews-Matrize exit poll chuan BJP leh an thawhpuite chu seat 29-36 inkar la turah a dah thung a, Left-Congress te chu seat 13-21 vel la tur leh Tipra Motha te chuan seat 11-16 vel la tur angin a dah thung.
Hel ni thin Tipra Motha president Bijoy Kumar Hrangkhawl chuan inthlan hma atang tawhin hung house a awm a nih chuan Tipraland state hran an duhna thlawp thei tur an thawhpui mai tur thu a sawi lawk sa thung a.
“Hung house a awm a nih chuan pawn lam atangin thlawptu kan ni thei a, mahse, chu chu House floor a tihchian a nih hmain paper-ah ziahfel sa thlapin State thar piantir a ni ang tia inremna siam lawk a ngai ang,” tiin a sawi.
Meghalaya
Times Now ETG Exit leh India Today-My Axis poll chuan sorkar siam thei khawpa party chak ‘Scotland of the east’ ah an awm an ring lo vek a, chutih laiin Meghalaya Chief Minister Conrad Sangma erawhin hnehna an chan theih a ring thung.
Times Now ETG Exit poll chuan Sangma NPP te chuan seat 18-26 la in, Trinamool Congress te chief minister hlui Mukul Sangma kaihhruai te chuan seat 8-14 an lak a ring a. UDP ten seat 8-14 vel leh BJP te chuan seat 3-6 vel an lak a ring bawk.
India Today-My Axis thung chuan NPP te chuan seat 18-24 an lak ringin sorkar an siam phak lo chiah chiah ang a ti a, UDP ten seat 8-12, Congress ten seat 6-12 vel leh, TMC ten seat 5-9 leh BJP ten seat 4-8 la tur angin a sawi lawk ve thung.
Nagaland
Nagaland-ah chuan NDPP te chuan seat 28-34 ve lain vote share 33% vel an neih India Today-My Axis te chuan an ring a.
Hei mai bakah hian BJP te chuan vote share 16% vel lai neiin seat 10-14 an lak a ring bawk a, a bik takin chu chu an campaign nasatna eastern Nagaland lamah an chak viau a ring a ni. Congress te chuan 10 per cent vote vel hmuin seat 1-2 vel an lak rin a ni a, Nagaland People’s Front te an MLA 21 laiin NDPP an zawmdan te chuan 13% vote share hmu in seat 3-8 vel an lak rin a ni.
Times Now pawhin NDPP ten seat 27-33 vel an lak a ring a, BJP ten seat 12-16 vel, NPF ten seat 4-8 vel an laka ring bawk a. Zee News-Matrize te chuan NDPP ten seat 35-43 an lak a ring thung a, NPF ten seat 2-5 leh Congress ten seat 1-3 vel an lak a ring thung.