State university nei turin hma kan la ang – H&TE minister

Central university leh college te inkara ‘affiliating system’ hman thin chu tih tawp a nih dawn avangin Mizoramin ama puala state university a neih a ngai dawn a, hma an la dawn tih Higher & Technical Education minister Dr R Lalthangliana chuan a sawi.
Tun dinhmunah a vaiin Mizoramah University Grants Commission hnuaiah recognised college 23 awm mek chu a lawmawm rualin, insiamthatna tur leh hmasawnna tur kawng tam tak a la awm tih a sawi a. Sawrkar laipuiin zirna tihhmasawnna’n ruahhmanna thar a siam reng a, RUSA 1.0 & RUSA 2.0 hmang zo tawhin RUSA 3.0 hman theih turin buatsaih mek tih a sawi.
Hetihlai hian central university leh college te inkara ‘affiliating system’ hman thin kha tih tawp a nih dawn avangin tuna Mizorama zirna in sang neihchhun MZU pawh research tan bik chauh hman thuai a nih hmel tih H&TE minister hian sawiin, “Mizoramin ama puala state university a neih a ngai dawn a, state university neilote tan chuan RUSA leh higher education atana scheme dangte atangin sum hmuh a theih dawn tawh loh avangin state university din a nih thuai theihna’n Mizoram sawrkar pawhin hma a la dawn a ni,” a ti.
NAAC accreditation-ah Mizoram chu rampumah higher education institutions-ah pakhatna a ni chu chhuanawm a tih thu te; AISHE Report (2020- 2021) ah Mizoram chuan 71% a hmuh laiin, kumin July-ah 83% a kaisangin rampum NAAC accreditation-ah titha ber a nih tak thu te; tun dinhmunah Mizorama college 19 chuan NAAC hnuaiah ‘valid accreditation’ neiin college pali chu accreditation validity a tawp hman thu te a sawi bawk.
Heng thu hi minister Dr R Lalthangliana hian Nilainia Govt. Aizawl College Mualpui Campus-a Boy’s & Women’s Hostel Extension building a hawnnaah a sawi a. He building hi RUSA 2.0 hnuaia Rs. 1,60,00,000 senga sak niin, 2019 September-ah hna tan a ni a, 2021 May 31 khan zawh a ni a. RCC building design-a sak hostel building pahnih hi lirnghing thlen thulhah pawh him thei ang ber tura duan a ni.