Steel container-a ei tur dah\hat loh chi
Steel container hi kan hmang lar viau a, a tlo a, silfai a awl a, han rem fel vel pawh a nuam. Choka-ah eitur chi hrang hrang dahthat nan te pawh an hmang a, khawi-lo chhuahva dawna eitur pai nan te pawh an hmang thin. A tangkai khawp mai. Mahse, kan eitur leh chawhmeh thenkhat hi chu steel container-a dah chi loh an ni a, steel nena ineitawn thei, eitur rim danglam phah thei te pawh a awm. Steel container-ah hian thil ro (dry) lam chi hi chu a dahthat theih deuh vek ang a, mahse, thil thenkhat hi chu a vawn that nana steel container hman a loh fuh zawk ang.
- Pickle: Pickle-ah hian chi-al, oil leh thûr (natural acid) a tam duh khawp mai. Chi-al thûr hian steel a ei thei a, stainless steel quality tha tak a nih loh chuan heng pickle ang chi te dahthat nan hman loh tur a ni. A rim a tidanglam thei a, a taste pawh a danglam phah thei a, a that rei loh phah thei bawk. Pickle lam chi dahthat nan chuan darthlalang bur hman a tha ber.
- Dhoi: Curd, yoghurt, dhoi kan tih ang chi-ah te hi a nihphungah a thûr (acidic) a, chuvangin a dahthat nan steel container kan hman chuan a rim a danglamin, a tui loh phah thei a, a lo inum chhunzawmin, a texture pawh a tidanglam thei. Chuvangin hetiang ho hi chu ceramic emaw darthlalang bowl-ah emaw dahthat zawk tur a ni a, chutah pawh hmun lum aiin hmun vawt/dai-ah dah tur a ni. Dhoi hi probiotic (bacteria tha chi) a ni a, pum tana chaw tha tak niin, chaw paitawih tinuam theitu a ni a, regular taka ei chuan pum a tihriselin, immune system thlengin a tihchak phah thei.
- Chawhmeh thûr lam chi telna: Steel leh thei thûr hi a inmil lo tih hriatreng tur a ni a, chuvangin, thil thûr lam chi telna eitur te chu kan ei nghal dawn a nih loh chuan a dahthat nan steel hman loh a tha ber. Kan chawhmeh ei bang te pawh thûr telna a nih a nih chuan a dahthat nan steel hman loh a tha. Ser (lemon) leh thei thûr dang ei nan steel kan hmang a nih pawhin, kan ei bang a awm chuan rei tak dah nan steel hman loh tur a ni a, steel aiin eitur dah nana him ang chi plastic lam te hman zawk tur a ni.
- Tomato tel tamna chawhmeh: Tomato rawt emaw, tomato tel tamna salad emaw, tomato tel tamna chawhmeh dang eng eng emaw te pawh kan ei bang dahthat nan steel hman loh tur a ni. Tomato-ah hian acid a awm a, chu chu steel nen a innawk rei chuan steel a ei thei a, a tih tui loh phah thei a, eiturin a chakna neih te a hloh then phah thei bawk. Tomato tel tamna chu ceramic bowl emaw darthlalang bowl-ah emaw dah zawk tur a ni.
- Fruit salad: Thei zailep emaw, fruit salad emaw kan siam a nih pawhin a dahthat nan steel hman loh tur a ni. Kan ei nghal a nih chuan a pawi em em chuang lo a, mahse, kan eibang dahthat tur a awm a nih chuan steel-ah dahthat loh tur a ni. Heng thei nêm deuh chi- balhla leh serthlum ang chi te phei hi chu thir nen a innawkin a inei thuai thuai thei a, kan thei dah te chu a tinemin a tikawi thei thin.