Sudan atangin US-in a khua leh tuite lachhuak

US military te chuan American diplomats leh an chhungte chu Khartoum atangin him takin a sawn chhuak tiin President Joe Biden chuan a sawi.
“Ka thupek angin United States military te chuan Khartoum atangin US sorkar mi leh sate an thiar chhuak” tiin thuchhuah a siamah a sawi a.
US official te chuan Pathianni khan mi 100 dawn chu Chinook helicopter hmangin Khartoum atang hian him takin an thiar chhuah thu an sawi a.
Hetih lai hian Khartoum-ah chuan army pawl pahnihte inbeihna nasa zual zelin Sudan regular army leh paramilitary force Rapid Supports Forces (RSF) te inbeihna chu a nasa rih hle a.
US Lt Gen Douglas Sims chan Navy Seals leh Army Sepcial Forces 100 chuang te chuan Djouti atangin Ethiopia-ah chutah Sudan an lut a, Sudan leilungah darkar khat pawh tling lo hun an hmang a ti a.
“Rang leh chak takin operation neih zawh a ni” tiin a sawi a. Biden chuan Djoutbi, Ethiopia leh Saudi Arabia te chu operation hlawhtling taka an neih theih nana an puihnaah lawmthu a sawi bawk a. Khartoum a US embassy chu khar a ni zui a ni.
US sorkar chuan Sudan khua leh tui te tana consular service a pek chu a titawp rih a, US private khua leh tui te lachhuak turin a him rih lo tiin a sawi bawk a.
Kar kalta Inrinni khan mi 150 vel te, diplomats leh international officials te chu tuipui lamah Saudi Arabian port Jeddah lamah thiarchhuah an lo ni tawh bawk a. Heng mite hi Egypt, Pakistan leh Canada khua leh tui te an ni deuh ber.
Pathinani vek khan French ministry of foreign affairs chuan an khua leh tui leh diplomats te chu an thiarchhuah tur thu a sawi bawk a. Sudan-ah hian inkahhaina awm tir tuma hmalakna a awm rualin a beiseiawm rih lova ngaih a ni.
Joe Biden chuan thuchhuah a siamah inkahhai a awm ngei theih nan sipai pawl pahnihte hnenah ngenna a siam a. Chu mai bakah humanitarian assistance a awm ngei remti tur leh Sudan mipuite zah turin ngenna a siam bawk.
UK pawhin a khua leh tuite lachhuak tura ruahmanna siamin a khua leh tuite chu Foreign Office ah in-report turin a ngen a. Canada sorkar pawhin a khua leh tuite chu hmun him lama awm hram tur leh an phone te charged-a a him a nih chuan Sudan chhuahsan turin ngenna a siam bawk.
Khartoum khawpuia cheng mi maktaduai 6 vel zingah hian African ram dang, Asia leh Middle East ram mi leh sate foreign student thahnem tak an awma ngaih a ni a.
Khartoum khawpuiah hian Sudanese army chief Abdel Fattah al-Burhan laka rinawm lehan elpui ber RSF te chu nasa takin an inbei mek a ni. Khartoum khawpuia inbeihna nasa avang hian electricity te pawh tihtawp niin ei leh bar lamah harsatna a awm tawh tia sawi a ni bawk.
Muslim holiday Eid al-Fitr puala nithum chhung inkahhai tir awm tura ruahmanna pawhin zawm a hlawh tak tak chuang lo tia sawi a ni bawk.
World Health Organization chuan mi 400 chuangin nunna an chan phah tawh a, mi sang chuangin hliam an tuar mek niin a sawi a, hei ai daih hian a tak takah chuan nunna chan leh hliam an tam zawka rin a ni bawk.