Jong-un nau Kim-i’n vaukhanna siam lawk

North Korean leader King Jong-un farnu thiltithei em em chuan tun hnaia US-South Korean deal chuan thil hlauhawm zawk a thlen dawn tiin a sawi.
Kim Yo-jong chuan North Korea chuan a nuclear ralthuam neih te chu tha zawkin a thuam tur a ni a ti bawk a.
US chuan North Korea nuclear ralthuam vauna laka vehimna kal zel turah South Korea-ah nuclear-armed submarine dah remtiin hei bakah hian Seoul chu a nuclear planning programme-ah telh ve a remti bawk a.
Hei vang hian South Korea erawh chuan ama pualin nuclear ralthuam neih tumin hma a la lo ve thung ang.
He inremna hi – Washington Declaration tih niin kar kalta khan President Joe Biden leh South Korean presidetn Yoon Suk-yeoul te chuan Washington-ah inremna an ziak dun a ni.
He mi chungchang hi sawiin Kim yo-jong chuan, “Kan hmelmate hian nuclear war exercise an neih nasat poh leh Korean peninsula ah nuclear asset an chhawp chhuak hnem dawn tihna a ni a, keini pawhin mahni invenghim turin nasa zawkin chet kan la zel dawn a ni,” tiin a sawi.
“North-East Asia remna leh muanna chu tihnghin tum mek a ni a, hei hian khawvel huapin dinhmun hlauhawm zawk a thlen ang,” tiin a sawi bawk. Kim hi Central Committee of the Workers’ Party of Korea a senior leader niin thunei tak a ni a.
President Biden thung chuan ram pahnih tena thawhdunna an siam chu fak thungin ‘North Korean beihna thleng thei laka invenna’ tiin a sawi thung a. President Yoon pawhin inremna chu ‘la awm ngai lo’ tia sawiin US-in a thawhpui ram nuclear weapons hmanga beihnaa a tawna a chhanna tur intiamna awm chhun a ti bawk.
Hetih lai hian China chuan tul lova boruak sosang siam lo tur leh innghirnghona lam hawi zawnga chetlakna awm thei a duh loh thu a sawi zui ve thung.
Inremna ang chuan US chuan South Korea ram chhungah kum 40 chhunga a tum khat nan a nuclear ralthuam keng tel thei submarine te a tir lut dawn a, hei bakah hian ralthuam tha leh hlauhawm tak tak nuclear ralthuam keng thei bomber te pawh a chhawp chhuak dawn a ni.
Ram pahnih te chuan Nuclear Consultative Group din remti bawkin chutah chuan thil pawimawh te sawihona neih thin a ni ang a. Seoul a politicians te chuan hun rei tak ata tawh Washington chu North Korea laka nuclear raltuam hman tul theihnaah ruahmanna awm thei siamah telh turin an lo ngen tawh a ni.