Puithuna leh mihring inzawmna

May 6, 2023 hian khawvela puithu taka thiltih hmuhnawm ber pawl : King Charls III leh a nupui, Camilla, Queen Consort te lallukhum khumtir a ni dawn a.
Hmuhnawm tak tur leh lal incheina hlu ber ber hmanga thuam an ni dawn a, ceremony pawh Archbishop of Canterbury chuan Westminster Abbey-ah a kaihruai dawn a, foreign royals leh heads of state rual an pungkhawm bawk ang.
Event pumpui chu khawvel hmuh theih tura pek chhuah a ni dawn a, mi maktaduai tel tak meuh meuhin an thlir tura ngaih a ni. Lallukhum khumtir an nih hnuah royal nupa te chu Gold State Coach, gold a hman tam em avanga sakawr pariat laiin an hnuh ngaihna hmangin Buckingham Palace an lut dawn a. Sipai sang chuang armed forces branch hrang hrang tena an ven tur ni bawkin generation thum chhunga military display turu ber tura ngaih a ni bawk.
Festival hrim hrimin tunkar a awh tura ngaih niin England ram pumah karleh Thawhtanni chu public holiday a puan a ni bawk a. Event neih turah hian parade te, public concert te, light show turu tak te, UK leh Commonwealth ramah te street party te huaihawt a ni bawk ang.
Chuti khawpa chetlakna chu hluar uchuak a tih theih tho ang a. A chhan ber pawh King Charles chuan UK tuipuia swans, dolphins, whales leh stugeons tin te-ah thuneihna nei mahse political power a neih chu ceremonial a ni deuh ber a. Chu aimah chuan lallukhum inkhumtirna chu King ni tura tihmakmawh a ni chuang lo. A nihna takah chuan Edward VIII pawh kha lallukhum khum tir miah ni lovin roreltu a ni thei. Lal thlaktu tur a nihna angin King Charles III pawhin September 8, 2022-a Queen Elizabeth II a thih khan automatic in lal thutthleng a luah nghal tho bawk.
Mahse, coronation ropui leh turu taka tih chuan awmzia thuk tak a nei lawi si a ni. Culture hrang hrangah ceremony chuan pawimawhna a nei a. Zirchianna neihah hetianga puithu taka thil tih thin hian institution tinghetin mihring rilru nena inkungkaihna a siam thei an ti. Entir nan, naupangte pawhin an piancham lawmna neih chu an upa ve zel tih an hriat phahna a ni an ti a. Kum upate pawhin lawm kher lo mahse an piancham a thlen chuan an rilru puthmang a danglam phah ve zel an ti bawk.
US-a zirchianna neihah basketball player tena free throw an vawm lai tihlan niin tu te nge basket-ah thun chat ang tih chu an inrinsiak tir a. Mak tak maiin player zingah pawh basketball an vawm hmaa pre-shot ritual neia ball han tuaivira chet la vel te chuan basket-ah ball an vawmluh ring an tam ber tlat.
Chutiang bawkin thil puitham leh chhinchhiahtlak deuh a thlena lawmna ropui tak emaw neih miah loh chuan thil hlutna leh mihring tena hlu a an ngaihna a tihniam thei tih a ni bawk. Survey neih pakhatah Covid-19 pandemic leng avanga zirlai graduation ceremony pawh hmang thei lote chuan chan nei riauah inngaihna an nei tih a ni bawk.
Greece ramah chuan mi tam tak te chuan naupangin baptisma a chan hma chuan birth ceritficate a nei thei lovah an ngai a, biak ina inneih kher loh chu inneihna anga ngaih a ni lo bawk. A nihna takah chuan chung thil thlengte chu legal document-a hming ziaha thleng mai thei a ni a, mahse, symbolism leh ceremony lawmna eng emawti taka neih khan a ti official riau a, paperwork aiin puithuna serh leh sang kalpui chu titaktu ber anga ngaih a ni tlat a ni.
Barack Obama-an US President a nih hmasak bera rinawmna thu a tiam kum 2009 khan US president 44-na ni tura a thutiam turah, “I will faithfully execute the office of President of the United States” tih turah Obama chuan, “I will execute the office of President of the United States faithfully.” a ti a. Thu inang reng, awmze inang reng, a sawi dan kalhmang inang lo a ni a. A nihna tur anga ngaih anga a sawi loh avangin Obama presidency chu tling lo riaua ngaihna piang nghalin a tukah Obama chuan fimkhur thu-ah tiin a ziaka awm angin thu a tiam nawn leh ngat a ni.
A lan dan maiah chuan serh leh sang kan atchilhna hian awmzia a nei lo a tih theih a, ‘ceremonial’ chuan a tak takah engmah awmzia leh hlutna a nei lo a tih theih bawk. Mahse, tun thlengin ceremony te chuan eng emaw ti takin mihring rilruah awmze thuk tak a nei tlat lawi si. Hlimna te, awmze nei riaua ngaihna te, tel ve riaua inhriatna te pawh a thlen thei a, hei vang hian social institution a luahin a fan tlat a ni.
Heng ceremony pawimawh te hi vantlang min phuarkhawmtu a ni bawk a, lungrualna thlenin mimal chu community tana penchhuak tur leh ngam turin a siam thei bawk. Research neihah pawh group ritual-a tel te rilru leh thinlung chu a inmila inpawhna an nei bik tih a ni.
State ritual kalpui phei chuan ram pumah inlungrualna a thlen thei an ti bawk a. Mihringte chuan dam khawchhuak zel turin myths, symbols leh rituals a invialchiat reng fo a ngai an ti bawk.
Chungte chu khawvelin a chhunzawm zel a, tradition te chu wine fir tha tak ang niin a upat poh leh a hlu mai a. Hei vang tak hian tih dan phung hman ata tawh kalpui dan te chu mihring ten thlak danglam an duh lo thin a, tunlai mila her danglam te pawh a awm chungin tun hmaa tihdan thlakthleng bur duh lohna a lian ber zel.
Tun hnaia Royal Family tena harsatna an tawh neuh neuh karah King Charles III Coronation chuan pawimawhna thuk tak a nei tura ngaih niin tun hnai lawkah Queen’s Platinum Jubilee lawm a ni a, British tena institution an ngaih pawimawhna a tithar an ti.
Tun kum za bi chhunga royal celebration turu ber tura ngaih chu King Charles III coronation a ni a, British mipuite a hneh zual phah ang em tih leh British society-ah a pawimawh zui zel ang em tih chu hunin a hril tur a ni.