Indian ultramarathoner Sufiya Sufi Khan chuan a international expedition hmasa ber zoin, Guinness World Record a siam nghal a, Qatar chhim tawp atanga hmar tawp thleng, kilometer 200 a thui chu drakar 30 leh minute 34 chhunga tlan thlengin record a siam a, Qatar tlam chhuak rang thei ber a ni.
-- Advertisement --
Sufiya hian January ni 12 zing dar 6:00 khan Abu Samra atanga bul tanin, January ni 13-ah Zulal Wellness Resort, Al Ruwais a tlan thleng a, record a siam ta a ni.
Sufiya hian a hna bansanin hetianga tlan hi a thlang ta zawk a, tunah hian kum 37 mi a ni tawh a, Ajmer, Rajasthan-a puang leh seilian a ni. Kum 10 dawn aviation industry-ah a thawk a, chutah 2017 khan Delhi-ah half marathon a tlan ve a, chu chuan a nun a sawi danglam ta vek a ni.
2018-ah chuan a hna bansanin thui tak tak tlan a ching ta a, marathon hrang hrangah a tel a, intlansiakna chi hrang hrangah a inlan bawk. 2018-ah chuan India record siamin, Golden Triangle an tih mai, km 720 a thui chu ni 16 chhungin a tlan chhuak hman.
2019-ah hmeichhe zinga Kashmir atanga Kanyakumari tlan thleng rang thei ber record a siam a, April 2021-ah ‘Indian Golden Quadrilateral Road’ tlan chhuak rang thei ber record a siam leh bawk. World record chi hrang hrang a siam nual tawh bawk a ni.