Sum leh work order nen mi lei tur an zawng – Lalsawta

Sum leh work order nen mi
lei tur an zawng – Lalsawta
Lunglei Municipal Council inthlan vuakvetah sum leh work order hmanga lei tur zawngin mi thenkhat an vak tih Congress president Lalsawta chuan a sawi.
Thawhtannia Lungleia thuthar thehdarhtute a kawmnaah Lalsawta chuan LMC inthlan turah sum leh work order hmanga lei tur zawngin mi thenkhat an vak huai huai chu pawi a tih thu sawiin, “Hetianga lei theiha mipui min ngai tlat hi a vanduaithlak ka ti. Kan ram a chhiat zel chuan tute pawhin kan tuar. Sal leh nawhchizuar ang maia lei theihin awm lo ang u. Lei theih loh mi tam tak kan awm a, lei theih lohin awm zel ang u,” a ti.
MNF-in Lunglei mipui rethei zawkte inhlawhna tur budget-ah an dah vek tawh tih an sawi chu thu dik lo a ni tih a sawi. “2023-2024 Budget Demand for Grants kha en ula, hetiang hi dah a ni lo. Politics hi duhtawka dawt sawi theihna tur emaw kan ti thin a, a ni lo,” a ti.
Lungleiin bial mipui thlavang hauh ngam MLA a mamawh thu leh tuna ruling MLA-ten anmahni thlangtu mipui aia chief minister an hlau chu MLA tha leh huaisen an nih loh zia tichiangtu a ni tih a sawi a. An sawrkar a nih chuan tu pawh CM ni se, an MLA-te chu an diknaah chuan an huaisen hle tur a ni tih Congress president hian a sawi.
“Kan ram chhiatna leh dam lohna thiam taka sawi thinte hi thusawi thiam kan tihte an ni ta mai a, a damdawi an sawi ngai si lo. Kan ram damdawi chu sawrkar tha a ni. Pathianin mipui tha leh ram tha min pe a, mi beidawnna thlentu ni loa beiseina leh rinna petu nih hi Pathian min din dan a ni,” a ti a. A kal tumna leh mipui hruai a tumna a hria a, a kal tumnaa kal tura tawntlang ngai chu Pathian leh political will hmangin a sutlang dawn a, zui tlak a ni tih Lalsawta hian a sawi.