Sum thianghlim loa hausa ngaihnep ngam a tul tawh – Robert Romawia

On Apr 26, 2023 25 0

Sum thianghlim loa hausa ngaihnep
ngam a tul tawh – Robert Romawia
Sawrkar hna kher zawng loa eizawnna lama hlawhtling an tam ta chu a lawmawm rualin, sum thianghlim lo lalut te ngaihnep ngam a tul tawh tih minister Robert Romawia Royte chuan a sawi.
Young Indians (YI) Mizoram leh sawrkar laipuia Ministry of Youth Affairs & Sports tangdun buatsaih ‘Y-20 Brainstorming Session’ chu Thawhlehni khan Aizawlah neih a ni a. He hun hmanpuitu Youth Services minister chuan Mizoramah thalai, sawrkar hna kher zawng lo sumdawnna lama hlawhtling tam tak an awm tawh chu lawmawm a tih thu sawiin, “Sum lakluhna erawh fimkhur a tul hle a; sum hnar thianghlim loa hausa te chu mipuiin hnualsuat a, ngaihnep ngam a tul hle,” a ti.
India-in G 20 President a chelh denchhana sumdawngte hmakhua ngaia Young Indians hmalakna chu fakawm a tih thu sawiin, Mizo thalaite leh sumdawngte tan a hlawkthlak hle dawn tih a sawi a. Entrepreneur hlawhtling ni turin information technology hman thiam a pawimawh, tiin, “Social media platform hrang hrang hman thiam phawt chuan game-changer a nih theih rualin, thu dik leh diklo thliarthiam a, ram changkang zawkten tuihalna dika an tuihal a, hriatna dik an zawng ang hian ngaituahna hmana thliar thiam a pawimawh,” Robert Romawia hian a ti. Mi hmanghria leh taimate tan chuan remchanna khawvel ‘full of opportunities’ a nih thu leh, tunhmaa awm ngai lo remchanna hman thiam a tul thu a sawi
Y-20 Brainstorming Session-ah hian Zotres Hospital Pvt. Ltd. atangin Trinity Hospital director leh CII (Confederation of Indian Industry) member Dr Lalrintluanga Jahau chuan CII chanchin a sawi a. CII hi kum 1895-a din niin, New Delhi-ah hmunpui a nei. CII chu sawrkar behchhan lo (non-government) leh hlawkna um lo (not-for-profit) pawl a ni a; industry leh civil society-te thanlen zelna atana ding a ni. Tunah hian CII-ah member 8000 chuang an awm mek.
Resource person-te atangin thusawi ngaihthlak a ni a. “Sharing of success story, Experience in Innovation and Business Development” tih thupui hmangin Mt. Carmel School principal cum proprietor Lalnunkunga Sailo, Lailen Consulting director/ CEO Alan Lalhriatpuia, Innovation and Business Development CEO cum LB Associates principal architect Lalbiakmawia Ngente, Zozia proprietor Laltanpuii leh LV Art proprietor Vanneihtluanga ten thu an sawi a ni.
Young Indians hi Confederation of Indian Industry peng pakhat ni turin kum 2002 khan din a ni a. Thalaiten ram inrelbawlna leh hmasawnna kawnga hmun pawimawh an chan theihna’n leh leadership skills an neih theihna’n hma la tura pawl ding a ni.