Zofate chunga pawikhawihna ZORO-in UNO-ah thlen dawn

On May 9, 2023 9 0

Zofate chunga pawikhawihna
ZORO-in UNO-ah thlen dawn
Manipur-a Zofate tawrhna chu Zo-Reunification Organisation chuan United Nations Organisation hnenah a thlen dawn.
ZORO Gen. Hqrs. chuan Manipur-a Meitei leh Zofate inkara buaina awm chungchangah Zofate inrawnkhawmna hmanhmawh chu Thawhtanni khan Aizawlah a ko a. Mizorama political party aiawh, NGO hrang hrang aiawh leh kohhran aiawh an tel. Manipur tualchhung buainaa Zofate tawrhna chu pawi an tih thu te, Zofaten chhawmdawl an ngaih thu te, khawvel hmun hrang hranga Zofate tanrual a ngaih thute an sawi a ni.
Inrawnkhawmnaa telte hian resolution an pass a. Manipur-a Meitei leh Zofate inkara tualchhung buaina chhuaka Zofate tawrhna an demin an duh lo hle a, hetiang buaina, a bikin chak lo zawk hmeichhia leh nunau pawisawi loin an tawrhna an dem takzet a, thleng nawn tawh lo se an duh tih an sawi.
Manipur-a Meitei leh Zofate inkara tualchhung buaina hi ring lomiten Kristian an tih duhdahnaah an ngai a, hetiang hi sakhaw zalenna India ramah thleng nawn tawh lo se an duh tih an sawi a. He buaina avanga Zofa nunna chan, hliam tuar, in leh lo chan leh biak in an tih chhiat zangnadawmna Manipur sawrkarin a pek an phut tih an sawi.
Manipur sawrkarin kawng hrang hranga Zofate pawi a khawih hi ram chhung leh ram pawn thleng pawha puanzar leh siamthata a awm theih nan ZORO-in phungbawm sawmin hma la se, hemi chungchang hi United Nations Organisatin (UNO) ah thlen ni se, an ti.
‘Manipur tlangram hi Zofate luah ram a ni a, a ram neitu chu Zofate (indigenouse people) kan ni. Chhuanlam hrang hrang hmanga Manipur sawrkarin Zofate in leh lo chhuhsak tum a, hma a la hi kan duh loin kan dem takzet a. Zofaten an hmakhua ngai a, hma a lakna – Peaceful Tribal Solidarity March an buatsaih avanga tharum thawha Zofate an bei chiam hi hriatthiam har kan ti a. Manipur sawrkar hian Zofate hi an ram chhuhsak a tumna chiang tak a ni. Manipura Zofate hian Manipur sawrkarah him loin an inhria a, chuvangin an himna turin rorelna hranpa India sawrkarin a pek kan phut a ni,’ an ti.