Suns in Williams an ban

NBA a team langsar pakhat Phoenix Suns chuan conference play-off semi-final atanga an tlak hnu lawkah an coach Monty Williams an ban.
NBA-ah champion tura rinkai Phoenix Suns hian Western conference semi-final-ah 4-2 in Denver Nuggets an hneh lova, final lut zo lovin an tla. Champion tura rinkai ni chunga conference final an lut zo lo hi an la na hle a, an coach Williams an petchhuak zui nghal.
Suns in an ban tan Monty Williams hi kum 2022 khan NBA Coach of the Year ah thlan a ni a. Kum li chhung Suns a enkawl chhungin season thum chhungin a zawnin play-off a hruai thleng a. Season an hman zawh takah player langsar Kevin Durant an lak hnuin champion turin rin an kai leh zual a, beiseina sang tak nen inlan mah se conference play-off final an lut zo ta chuang lo.
Suns in an head coach an ban vang hian NBA club pangate chuan season tharah head coach thar an neih a ngai dawn. Miami Heat lakah an tlawm vangin Milwaukee Bucks chuan 2019 coach of the year Mike Budenholzer an ban a. Toronto Raptors pawhin an head coach Nick Nurse an ban a, Houston Rockets in Stephen Silas contract thar an ziahpui lo va, 2018 coach of the year Dwane Casey chuan Detroit Pistons a chhuahsan ve bawk.