Super Tuesday-ah Biden leh Trump

US President Joe Biden, Democratic party leh A thlak tak Republican party Donald Trump te chuan US state 15 a November thlaa US inthlanna neih tura party candidate tur thlanna primary neihah chakna chang ve ve hei vang hian November thlaah an pahnih bawkin an intum leh ngei dawnin a lang.
Super Tuesday election result chhuah hnuah kum 77 a upa Trump chuan delegate neih ngah lamah amah eltu Nikki Haley chu a khum hneh hle tawh a.
Joe Biden pawhin Democratic primary neihna state-ah chakna a chang vek a, American Samao-ah erawh Jason Palmer a chak zawk thung.
“Joe Biden chuan primary cycle-ah harsatna hmachhawn a nei lo va, Democratic contest tinah chakna a chang vek rih a ni” tiin CNN chuan a tarlang.
Kum 52-a upa UN a US envoy hlui leh Trump khingtu Haley chuan Vermont state ah chakna a chang thung a, a bak zawngah chuan Trump an hnehna a chang vek a ni.
Super Tuesday neihah Trump chuan California, Texas, North Carolina, Tennessee, Alabama, Virginia, Oklahoma, Arkansas, Massachusetts, Utah, Minnesota, Colorado, Arkansas leh Maine ah te chakna a chang a. Super Tuesday hi presidential primary neiha pawimawh ber niin a ruala state hrang hrang ten an aiawh tur an thlan hun a ni a. Trump chuan Vermont tihchauh lohah chuan chakna chang vekin Vermont a a chaklohna pawh one per cent vel lek a ni.
Republican party bikah presidential nomination nei thei turin canddiate pahnih te chuan delegates 1,215 an neih phak a ngai a, primary hmangin delegate an neih tam leh tamloh a hriat mai dawn a. Super Tuesday hma khan Trump chuan delegates 244 nei tawh sa in Haley chuan 43 chauh a nei thung.
Trump chuan result chhuah hnuah, “Kan ram kan inthen hrang nasa hle tawh” tia sawiin a rang thei ang berin inlungrual turin hma kan la ang a ti a.
“Zan duhawm tak a ni a, kan ram history a hun pawimawh tak a ni” tiin a sawi zui bawk a. “Kan ram kan inthen hrang nasa tawh a. Kan ramah hian politics khel ten an political opponents te hmanruaah an hmang tawh a ni” tiin a sawi bawk a.
US political system chu ‘third-world ram’ te nen a khaikhin bawk a. “Hetiang hi he ramah hian a thleng ngai lo, ram danga thleng thin a ni a, chung te chu third-world ram te an ni” Engti kawng emaw takin third-world ram angin kan awm a ni tiin a sawi bawk.
President a nih laia a hlawhtlinna te sawiin chung zingah chuan US leh Mexico ramri a zahve pinphui hman te a sawi a, “Khawvelin min nuihsawh a, remchangah min hmang mai mai ani” a ti bawk.
President a nih chaun US chu energy a intodelh leh energy lama lian ber nih a tum thu a sawi bawk a. “Tuna harsatna kan tawh zawng zawng te, kan harsatna tawh tin te hi tawk hauh lo tur kan ni mw le. Kan hlawhtlin a ngai a, chu chu he ram inlungrual nan leh party inlungrual nana kawng awmchhun a ni” tiin a sawi bawk.

Lungawilohnaa khat Trump : Biden
Joe Biden chuan a term khatnaa a sorkar hlawhtlinna neiin Trump a tling leh a nih chuan ‘buai nuai nuai, inthendarhna leh thimna’ in a zui dawn a ti. “Kum li kalta khan president ka chuhna chhan chu Donald Trump hnuaiah America dinhmun derthawng a awm vang a ni” tiin Biden chuan a sawi a. A sorkar hnuaiah hna siam a ni a, inflation a tlahniam a, damdawi man hniamin gun control kalpui a ni a ti bawk a.
Trump an White House a luah leh a nih chuan ka sorkar in hmasawnna kan kalpui mek te hi dinhmun derthawngah a awm dawn a ni a ti bawk a.
“Trump hi lungawilohna a khat a ni a, phuba lak bak a rilruah awm lovin American mipui te a ngaihtuah lo” tiin Biden chuan a sawi bawk.

“Haley in engmah thleng dawn lo” : Trump
South Carolina governor hlui Haley chuan a boss hlui Trump chu a thlawp dawn leh dawn loh a la sawi lo va. Ngaihdan in ang lo awmin Trump chu thlawp mai se team player ni mai se an ti a. A then erawh chuan Trump a thlawp a nih chuan zalen tak leh huaisen taka Trump a sawisel ngam thinna laksakin a awm dawn an ti thung.
Haley ngei pawhin midang thlawp a la ngaihtuah loh thu sawiin amah ngeiin chakna a chan theih nana a inthlurbing mek thu tunhnaiah a lo sawi tawh bawk.
Mahse Trump chuan tun hnaia interview a neihaah Haley campaign chuan ‘engmah a thleng dawn lo’ tiin a sawi a. Trump team te chuan Haley te chuan Republican nominee ni tura delegates mamawh zat a hmu zo dawn chuang lo an ti bawk.
Hetih lai hian Donald Trump thlawptute chuan Super Tuesday a Donald Trump an chakna nasa tak a chan chuan Nikki Haley chu lohtheihlohin inhnukdawk turin a siam dawn tho tho an ti thung a. Mahse, Nikki Haley chuan inhnuhdawh tumna emaw chuti lam hawi tawngkam engmah a la nei lo thung.