Suzuki V-Storm Expedition a Umling La kal ten Aizawl rawn thleng

Suzuki Motorcycle India buatsaih, Suzuki V-Storm motorcycle neitu te tana V-Storm Expedition-a Mizoram atanga V-Storm rider kal Loz Hnamte, Zonuam, Lawmsangzuala, Mission Vengthlang, H. Vanlalhruaizela, Luangmual, Malsawmtluanga, Samtlang, Malsawmtluanga, Salem Veng leh Lalrempuia, Lunglei te chuan nimin tlai khan LBS Suzuki showroom, Aizawl an rawn thleng leh ta. He expedition-ah hian Delhi atanga chhuakin, khawvela motor kal theihna kawngpui sang ber ni thin Umling La Pass thleng V-Storm motorcycle a kalin, heta tang hian Delhi an let leh a ni. (Umling La hi khawvela motor kal theihna kawngpui sang ber a ni thin a, mahse, kar kalta khan Mig La Pass an hawng leh ta chiah a, hei hi Umling La aiin feet 300 velin a sang zawk a, record thar a ni ta a ni).
He expedition hi rampum huap niin, rider 35 vel an tel a, mahse, Umling La thlenga kal hi rider 27 an ni a, Mizoram atanga kal zingah Loz Hnamte, Lawmsangzuala leh H Vanlalhruaia te pawh a summit zingah hian telin, midang pathum ten hmun sangah taksa lama harsatna an tawh avangin Umling La hi an thleng ve thei ta lo deuh a ni.
Umling La hi feet 19,024 (meter 5,799) a sang niin, he expedition-a kalte hian ni 10 hun an hmang a, Delhi-Umling La-Delhi-ah hian km 2700 vel tlanin, petrol Rs 6,000-7,000 man vel an hmang niin an sawi a, nikhata an tlan thui ber niin km 430 vel an tlan a, an tlan rei ber ni chu Jispa-Leh niin, km 350 vel hla chu zingkarah chhuakin, zan dar 8:30 velah an thleng a, Delhi-Chandigarh an tlan laiin an tlanchak dan hi chawhrualin 85-100 kmph vel niin an sawi a, 130kmph vela tlan chang pawh a awm nual niin an sawi bawk.
He expedition-ah hian a duh duh kal ngawt theih a ni lo a, entry limit awmin, Mizoramah Suzuki dealership LBS Suzuki hriatpuinain Suzuki V-Storm Club a awm a, club hruaitute leh LBS lamin hma lakpuii, LBS Suzuki hian Mizoram atanga kalte hi a sponsor a, a kal tur mipakhat tan registration fee Rs 30,000 zel a ngai a, hei hi LBS-in a tum sak vek a, Aizawl-Delhi thlenga an kalna a tum sak vek bawk a, Delhi atangin company-in engkim a lo tum sak ve thung a. Mizoram atanga kal ten LBS Suzuki chungah lawmthu sawiin, “Hetianga mahni customer te ngaihsak hi an awm lo, Mizoramah customer sponsor-a hetianga kaltir hi a la awm ngai lo, hei hi kan lawm em em a, an hmalakna zar liau liau a ni. Keimahni min sponsor-na hi a let tam takin Pathianin malsawm rawh se,” an ti.
Hei bakah hian he expedition an kal chhunga Pathian hruainaah lawmthu an sawi a, Loz Hnamte chuan, “Pathian hnenah lawmthu kan sawi a, kan thian pakhat hi hrisel lohna a nei a, kan kal dawn pawhin a chhungten min lo ngaihtuahpui dawn nia an ti a. Kan ngaituah viau a, mahse, ani a tawngtai tam a, ani hi a kalho zingah a vannei ber a, engmah buaina a nei lo a, midang zawng hian harsatna neuh neuh kan nei vek a, kan nuamsam lo deuh vek a, ani hi chuan engtik lai mahin problem a nei lo. High altitude a vawi khat kalna a ni a, mahse, engmah buaina a nei lo, a enjoy ber zawk. Chung zawng zawng a thlen theihna chu Pathian hnena a inhlanna vang niin kan hria, Pathian hnena inhlan pawimawh zia kan hmuh belh a ni,” a ti bawk.
Suzuki V-Storm chu hetianga hla tak tak tlanpui atana duhthusam ni a an hriatthu an sawi a, Loz Hnamte chuan, “A rawn chhuah hlimah Nepal kan kalpui tawh a, a tha ka ti viau a, tlang rin aia tha a ni. Tunah hian a chhuak thar ka keng a, a hma ami aiin a tha lehzual niin ka hria. A seat a dup nuam em em a, thutin kan position a dik em em a, kawng chhia-ah pawh a sawh a hrehawm lo, a sawh a nuam bik. Bungraw phurhnan a hnung a lo sei a, thil han tawn beh nan awl, zin nan chuan he bike hi a tha. Duhkhawp lohna pakhat chiah ka nei a, chu chu ABS a hnung hi off theihin awm se, tih a ni mai. Chu bak chu an sawisel tur ka hre lo,” a ti.
Phai kawng nuamah 90-130 kmph vela tlan par par pawhin harsatna engmah an tawk lo niin an sawi a, vibration a awm lo a, a cooling system hi liquid a ni lonain, engmah harsatna a awm lo, tha an tih thu an sawi vek.
Hruaizela chuan, “Kawngna nei ka ni a, kan kal dawnah pawh kawnga hren tur ka lei a, mahse, chupawh chu kawngtluanin vawi khatmah ka hmang lo. Ni 10 chhung zet chu nileng lengin kan tlan a, chuti chung chuan kawng khamna hrehawm leh han sil deuh them thum te pawh kan nei lo tlat,” a ti ve bawk.
Mizoram atanga rider paruk kal zinga pathum ten Umling La an thleng thei ta lo erawh pawi an ti a, taksa hriselna lamah inbuatsaih that a tul zia an hriatchian phah nasa niin an sawi a. Summit thei ta lo zinga mi pakhat chuan, “Kan inbuatsaih chawpchilh viau nain, kal theih ka inring lutuk. Mahse, hmun sang han thlen tak takah chuan meizu mi te ka lo ni bawk nen thawk a harsa a, ka blood oxygen level a lo tlahniam lutuk a, Ladkh thleng chauh ka kal theih phah ta a ni. Thla 2-3 vel tal chu lo inbuatsaih thei ila chu a tha tur a nia,” a ti.
Loz Hnamte pawhin, “Ka ride ve nasa tawh a, tun tum pawh hi ka huphurh lo, kawng a tha alawm ka tia. Mahse, kan kal chiah a, rinphak bakin thlaler a tam a, hmun sang a tam bawk sia. Hmung sang taka kan lawn a, hmun hniamah kan chhuk leh a, khatiang kha a tam em em a. Tun tum kan ride chu hrisel a lo ngaihzia leh inenkawl that a pawimawhzia ka hrechhuak nasa khawp mai. Kan ride hmain thla hnih vel gym-ah ka lo kal ve hman hlauh a, chuti ni lo phei se chu ka buai ka ring,” a ti ve bawk.