Exer lak laiin i taksa ngaithla rawh

Exer lak laiin i taksa ngaithla rawh
Exercise i lak laiin i taksaah na a awm emaw, ri deuh fek fek emaw, thildanglam deuh a awm a nih chuan, chawl la, hriatchian tum ang che.
Dr DY Patil University-a Department of Physiotherapy-a professor Dr Shivani Chowdhury chuan, exer lak laia i chau deuh thut a, i zawi riau a nih BP hniam vang emaw, thawh thut luhai (sudden change of position- sitting to standing or vice versa) emaw blood sugar hniam thut emaw, exercise lak nasat lutuk vang emaw te a ni thei, a ti a, exer lak hian beng chhung lam fel lohna (inner ear disorder) kan neih sa te chawk thoin luhai (vertigo) te kan neih phah thei bawk. Kan exer lak dan step kan ngaihtuah nasat lutuk vangin kan lo thaw tha tawk lova, kan oxygen hip luh a lo tlem thut vang a ni thei bawk.
Studio 5 Aerobic Centre a thawk Nuri Khan chuan, “Exer i lak hmain tui in ang che. Over-exercising a awm thei, tih nasa lutuk emaw tih ran lutuk emaw te a awm thei. Zan lama mut tlem vangin exer lak laiin kan nguai thei bawk,” a ti.
Engtin nge i tih tak ang? I BP check la, zan mut that tum bawk ang che. Exer i lak zawhah muangchangin kal kual la, i lungphu a zawih deuh hun nghak ang che. I chau viau a nih pawhin i lu chu i lung (heart) aia hniama dah loh tur a ni, chuti a nih loh chuan i BP a nghawng ang a, nikhawhre lova tluk (faint) thut pawh a hlauhawm. Tui emaw energy drink emaw tlem in ang che. I ding tha hleithei lo va, tlu mai tur anga i awm (dizzy) nasa telh telh a nih chuan damdawi lam thiam rawn thuai a tha, a chhan chu seizure leh stroke te pawh a lo ni palh thei.
Exer lak zawhah i ham (yawn) pawh a ni thei, chu chuan i chau tih a entir a, hah taka chet hnuah i thluak a intidai tih a entir bawk. Mahse, i ham nasa lutuk a nih chuan ngaihthah tur a ni lo, lung lam that lohna i lo nei ru reng tihna pawh a ni thei. Treadmill emaw motor khalh lai ten i muthlu lo chauh zel a nih chuan sleep apnea emaw narcolepsy emaw vang te pawh a ni thei.
Engtin nge i tih ang? A khat tawka ham mai mai satliah i nih chuan ngaihthat lohna tur a awm chuang lo, zan-ah mu tha la, a nih loh pawhin i exer lak hun thlak mai rawh. Mahse, i ham nasa telh telh a, i chak lo riaua i inhriat chuan doctor rawn a hun tih hria ang che.