Time magazine thiam tih ber Messi

Time magazine thiam tih ber Messi
Khawvela magazine lar leh ngaihsan hlawh Time magazine chuan kum tina an tih danin kum khat chhunga infiammi thaber an thlangchhuak leh a, Argentina forward Lionel Messi chu Time magazine Athlete of the Year-ah an puang.
Nikum Qatar ram World Cup-a Argentina a champion-pui hnu khan a record kawl lai belhchhahin a tum riatna atan October thla mai khan Ballon d’Or award a dawng a, tunah Inter Miami forward Messi hian media lam atanga chawimawina ngaihhlut hlawh dang a dawng zui leh ta a ni.
Kumin July thla maia Miami a zawm hnu khan Messi hian a club thar tan inelna hrang hrangah game 14 atangin goal sawmpakhat a thun tling a, Inter Miami club chanchina an trophy lak vawi-khatna ni turin Leagues Cup a chawipui tawh bawk.
Kum 36 mi an thlan chhan Time chanchinbu chuan tarlangin, “Lionel Messi hian kuminah tih theih loh ni hiala lang a hlenchhuak a, chu chu Inter Miami a zawm hnua US chu soccer rama a chantir thei hi a ni,” tiin.
He magazine hian US leilunga Messi a luh rualin football khel entu an pung nghal thur thur a, ticket man a sang dawrh dawrh a, football kaihnawih sumdawnna pawh kang chho dawrhin, MLS game entu pawh an pung nangiang niin an tarlang.
Argentine striker lo lan hma hian gymnast Simone Biles, swimmer Michael Phelps leh NBA superstar LeBron James-te pawhin he award hi an lo dawng ve tawh bawk a ni.
A contract tawp ruala Paris St-Germain a chhuahsan lai khan Messi hian a naupan lai atanga a lo vawn tawh Barcelona ngei maia kirleh chu a duhber a nih thu sawi chungin a taka chanchit theih a nih loh thu a lo sawi tawh a ni.
Sum lama harsatna lian tak tawk Catalan team-a akir theih tak loh hnu khan Miami nge tunlaia superstar uaithla lamte kal intihhmuhna Saudi Pro League lam a pan dawn tih zawhna a piang hman a, chumi boruak chu sawiin, “Ka duhthlan hmasaber chu Barcelona-a kir kha ni mah se thil theih a ni lo. Kir dan kawng kha ka dap ngei a, ka duhthusam a thleng zo lo.
“A hnu lamah Saudi league-a kal ve mai ka ngaihtuah ngial hman tih hi ka zep lo a, a chhan pawh he ram hi ka hriat tawh ram niin, kan hma lawka competition huhang ngah tak rawn ni chho mai tur dinchhuak thei ram an ni.
“Saudi Arabia nge MLS tih ka buktawn lai khan an pahnih hian phurawm ka ti ve ve a,” tiin a hnuchhawn tak Arab lam pawh a dahhniam loh thu a sawi.
Time hian sap nula zaithiam Taylor Swift chu 2023 Person of the Year atan an thlang tih tarlang tel mai mai ila!