Sydney tuipui kamah Juda chawlh hmang 12 kap hlum

Sydney tuipui kamah Juda chawlh hmang 12 kap hlum
Sydney-a Bondi Beach-ah mipa pahnihin Juda chawlh hmanga pung khawmte pawng kaha mi 12 an thi a, mi dang tam tak hliam an awm bawk tih Australian thuneituten an sawi.
A kaptu nia rin pakhat chu a thi ve a, pakhat zawk pawh na takin a inhliam a, mi 11 damdawi inah dah an ni tih New South Wales state police-in an sawi a. Hliam tuar zingah police officer pahnih an tel bawk.
Australia-ah hian October, 2023-a Israel-in Gaza a rûn atangin Juda leh a kaihhnawih beihna hi synagogue, building leh car-ah a thleng nual ta.
Pathiannia thil thleng hi tuipui kam lar, nipui chawlh hmang tam tak awmna niin minute 10 vel chhunga thleng a ni.
Prime Minister Anthony Albanese chuan he thil thleng hian ‘a barakhaih thu leh hrehawm’ a tih thu a sawi a, ‘rikruma che chhuak thinten a hmunah nunna chhan tumin an bei nghal’ tih a sawi bawk.
Israeli President Isaac Herzog-a chuan Hanukkah chawlh hmanga tuipui kama pung khawmten bati hmasa ber an chhit dawn laiin ‘firfiak rawng takten an bei’ niin a sawi.
Israeli Foreign Minister Gideon Saar-a pawhin inkahna thleng chu pawi a tih thu sawiin Australian sorkar chu a hmaa inralrinna tur tam tak a hriatte ‘ngaihven tawk lovah’ a puh.
“Heng thil thleng hi kum hnih liam ta chhunga Australia kawtthlera Juda mi huatna thleng a ni a, Juda huatna hian khawvel huap a dap chhuak a ni,” a ti.
Khawvela tuipui kam lar ber pawl, Bondi-ah hian tual chhung mi bakah khualzin tam tak an pung khawm thin.
Muslim pawlte pawhin he thil thleng hi an dem thu an sawi a. “Kan khawtlangah hetiang tharum thawhna leh sualna hi kan duh lo va, a mawhphurtu hi dan ang taka hremna hmu ngei tur a ni,” tiin Australian National Imams Council, Council of Imams NSW leh Australian Muslim chuan thu an chhuah.
Australia-ah hian inpawng kahna hi a thleng tam lovin khawvelah hetiang kawnga ram him ber pawl a ni a. Pathiannia thil thleng pawh hi kum 1996-a chhim lam state, Tasmania-a khualzinte hmuna mi pakhatin mi 35 a thah hnua thi an tam leh ber tum a ni.
X-a video dah chhuah darhah chuan tuipui kam leh a bul len khawthawnna hmuna awmten silai ri leh police siren ri thawm an hria a. Video pakhatah chuan kawng dum ha pakhatin silai lian tak a kap lai leh T-shirt var ha pakhatin bei leta a ralthuam a chhuh lai a lang a. Mipa dang pakhatin kea kalna lei atanga silai a kap lai a lang bawk.
Video dangah uniform ha police-ten kea kalna lei te tak teah mipa pahnih an bawhbet lai a lang a. Officer-te hian reh beh a tum niin a lang bawk.
Tun tum thil thleng hi mipa pakhatin Sydney-a Lindt Vafe-a mi 18 a hren champha kum 11-na thlen dawn hnaiha thleng a ni a. Hemi tum hian darkar 16 a hren hnuah a hren mi pahnih leh a hrengtu hi thah an ni.