Synagogue-a car-a mi pawng chil leh vihnaah Juda pahnih thi
Synagogue-a car-a mi pawng chil leh vihnaah Juda pahnih thi
Manchester, England-a synagogue-a car-a mi pawng chil leh vihna thlengah Juda pahnih an thi.
Juda sakhaw calendar-a an ni thianghlim ber, Yom Kippur-ah he thil hi thleng niin police chuan firfiak chetnaah an ngai.
Police hian a titu pawh an hria a, a hmunah hian kah hlum ve nghal a ni tih an sawi.
Hliam tuar zinga mi pali chu an na deuh va, damdawi inah enkawl mek an ni.
Police chuan Ningani zing dar 09:31 (India-a chawhnu dar 02:01)-ah Heaton Park Hebrew Congregation Synagogue-a car-a mi ding khawm sut leh mipa pakhat vihna a thleng tih an sawi.
Officer-ten thil pawi lian tak a thleng tih puangin Manchester hmar lam hi minute sarih hnuah an thleng.
Synagogue-ah hian mi tam tak an awm khawm lai niin a chhung leh a bul hnai chu a him nan an hual nghal vek.
Greater Manchester Police chuan inkhawm leh venhim hna thawktuten huaisen takin a beitu hian in chhung a luh loh nan an lo dang tih an sawi.
A hmun hi khar nghal niin fire leh ambulance staff an thleng a, a bulah Juda mite leh mi dang tam tak an pung khawm zui bawk.
Manchester Mayor Andy Burnham chuan chawhma dar 10:30 velah chuan hlauhawm a tawp tih sawiin mipuite chu police puia an hmalakna tawiawm turin a sawm.
Police chuan chawhnu dar 03:15-ah Juda pahnih an thih thu leh damdawi inah mi pali enkawl mek an nih thu an sawi a. Hliam tuarte hi car-a sut leh vih hliam niin an sawi a, vih hliam hi security guard nia hriat a ni bawk.
A hnu lawka national counter-terror police hotuin New Scotland Yard-a thuthar lakhawmtute a kawmnaah firfiakte chetna nia an ngaih thu a puang a. Mi pahnih an man thu Assistant Commissioner Laurence Taylor-a hian a sawi bawk.
Prime minister chuan Judate ni thianghlima thil thleng a dem tak zet tih sawiin Denmark-a politics-a intawh khawm pawh a hun hmain a chhuahsan a. Ningani zan khan London-ah hmanhmawh taka COBR committee thutkhawm a ho nghal.
Police chuan a titu nia rinhlelh hi an hre nghal a; mahse, a ni ngei tih erawh an la finfiah thei lo tih counter-terrorism policing chief Taylor-a chuan a sawi.
GMP chief Sir Stephen Watson-a chuan an rinhlelh hial puak thei ni ngeia ngaih a inbel tih a sawi a; mahse, a hnuah a ni lo tih an finfiah leh tih a sawi.
Hung chhung pawn lam atanga a thlalak anb tihchhuah pawh a awm a, hei hi police-in an kah hlum tak ngei pawh a ni tih finfiah a ni.