Synod Zirlai Viltu-in UPSC Prelims tlingte pui
Mizoram Synod hnuaia Zirlai Viltu Committee chuan kumina Union Public Service Commission hnuaia Mizo zinga preliminary exam-a inziaktlingte chu sumfaiin puihna a hlan.
Synod moderator Rev Dr C Chawnghmingliana’n UPSC prelims-a inziaktling thar Mizo pasarih hnenah cash incentive Rs. 50000 theuh ruahman hi a hlan a, Zirlai Viltu Committee member Benjamina, ID&AS (Rtd) in thu a sawi a ni.
Zirlai Viltu Committee chairman, Synod executive secretary Rev Dr K Lallawmzuala sawi danin, Mizoram Synod-in Mizote central service leh All India service-a kan tlin tam theihna atan ngaihtuahna sengin, 2018 Synod Inkhawmpuiah helama hma latu tur din a rel a, hemi bawhzui hian kum 2019 khan Synod Executive Committee hnuaiah Zirlai Viltu Committee hi din a ni ta tih a sawi.
Covid leng vangin duh anga chakin hma lak nghal mai theih ni lo mah se, theih ang angin an bawhzui a, Synod Conference Centre-a room pakhatah ‘Synod Resource Centre’ dinin, central service leh All India service lama exam bei turte tan an inbuatsaihna tur lehkhabu tha an chhawpsak bakah central service/ All India service lama Mizo zinga retired ten a tul anga rawn theihin resource person-in an awm a; kumin atan July 15 thleng member nih dil theih niin, higher secondary zirlai atanga master degree zo tawh thlengin member nih theih a ni.
“Mizo thalai a duh apiangte tan Mizoram Synod chuan kawng a hawng a, he programme hi Presbyterian kohhran tan chauh ni loin, Mizo tawh phawt chu, eng kohhran mi pawh nise, Synod hi a inhawng em em a, kan Resource Centre hi hmang tangkai turin kan duh a ni,” a ti. UPSC prelims-a tlingte lawmpuina angah pawh hian eng kohhran mah thliar loin, lawmpuina, anmahni tih phurna leh an kalelna atan sumfai hi an hlan a ni tih a sawi bawk.
Zirlai Viltu Committee hian cash incentive hi kum 2021 khan prelims-a tling mi 7 hnenah, 2022 ah mi pali hnenah, kuminah mi 7 hnenah an hlan a; incentive hi tum khata tling tharte hnenah chauh hlanin, a hma lama tling tawh, tling nawn lehte hnenah chuan hlan a ni tawh lo.
Kuminah hian mi nuai 13-in UPSC prelims exam atan hming an pe lut a, mi 14642-in prelims hi inziaktlingin, Mizo 12 an tel a ni.