System dika kal kan zuar – MBJP V/P

System dika kal kan zuar – MBJP V/P
BJP chuan kalphung thar niloin, system dika kal an zuar tih BJP Mizoram vice president R Vanramchhuanga chuan a sawi.
Thawhtannia an party office-a karthar inhlannaah State BJP vice president chuan LMC-ah ZPM party-in hnehna an chang chu an lawmpui a, state-ah sawrkarna changlo mah se, eng kalphung nge tih erawh LMC-ah a lang turah an ngai tih a sawi.
“BJP chuan kalphung thar niloin, system dika kal hi kan zawrh a ni a, inkaihhruaina mumal tak awmsa hmanga hmasawnna hna thawh, sum leh pai hman dan dik, Mizorama kan hmuh ngai loh development thar thlentirte hi kan kalphung tur a ni. BJP kan sawrkar chuan corruption kan do dawn avangin, ZPM leader-in corruption a ngaizam ang mai mai kha a leng ve dawn loa, corruption hi kan state chhiatna bul a nih vangin kan do tur ber a ni dawn,” a ti.
Union Home minister-in Assam Rifles hmun thar hawnna leh Mizoram hmasawnna tur project dang a hawnnaah Mizoram sawrkar dilna vang ringawt a nih loh zia leh BJP Mizoram-in AR sawn chhuah kan lo dil fo tawhna hria a, Mizoram mipui hriata tarlan a ni chu lawmawm an tih thu BJP hruaitu hian a sawi a. Hei mai niloin West Phaileng leh Marpara inkalpawhna kawng siamthatna tur pawh an State president hmalakna pakhat a ni tih a sawi bawk.
Mahni party hamthatna duh vanga dan kalha party dang beih chiam chu a pawi hle tih a sawi a. Pathian biakna hmun – pulpit leh platform atanga sakhuana behchhana politics-a inbeih chu ‘The Religious Institution (Prevention of Misuse) Act 1988’ in a khap tlat a ni, tiin, sakhaw biakna hmun atanga dawt hmanga BJP bei fo thinte chu court hmaa an insawifiah hun a thlen ala ngai dawn tih a sawi a ni.