Tanrual chuan central kan nawr kal thei – Dr K Beichhua

Mizoram leh hnam tana tha turah chuan mipui kan tanrual a ngai a, tanrual chuan zahawm takin central kan nawr kal thei dawn tih BJP MLA Dr K Beichhua chuan a sawi.
BJP Mizoram chuan Ningani khan Aizawlah State Executive Meeting an nei a. State president Dr K Beichhua chuan, India ramah issue engemaw a thlenin Mizote kan buai hluai zel a, kan buai chhan ngaihtuah chian a ngai thin tih a sawi. Central India-a politics inbeihna tha lo tam tak an chinte Mizoramah kan lo phurpui ve leh hluai thin a, kan buai chhan hre mumal lo tam tak kan awm thin tih sawiin, “Chutihrualin, Mizoram leh hnam tana tha turah chuan kan tanrual a ngai a, population tlemte ni mah ila, tanrual chuan zahawm takin central kan nawr kal thei dawn a ni,” a ti.
India rama kan awm chu a vanneihthlak zia kan hriat nawn a ngai tih a sawi a. India ramah Hindu population 80% vel an awm avangin ‘Hindu ram’ tia chhal theih a ni, tiin, Hindu-te chu zaidam tak an ni a, India ramah zalen taka kan nun ho theihna chu India rama a tam zawk Hindu an nih vang a ni tih a sawi.
“Kan thenawm ram Bangladesh-ah emaw Pakistan-ah emaw awm ta ila, Kristian tlemte hi kan chep hle dawn tih a chiang. Zalen taka rawngbawla kan chhuak theite hi a ropui a, Pathian-in min hruai zel anga, kohhran atang mai ni lo, kan ram inkaihhruainaah dik tak leh fel taka Pathian tih chunga kan kal hunah Krista chanchintha hi kan sawi aia ringin India rama Hindu kulmukten an la hmu ngei dawn,” a ti.
Kan do loh tur kan do em tih ngaihtuah chian a ngai BJP Mizoram hruaitu hian a sawi a. Central atangin Mizoram mamawh leh hmasawnna a lokal a ngai a, malsawmna min petu sawrkar laipui kan lo do hian awmzia a nei loa, state anga kan mamawh leh duh kan thlen chuan min tihsak thung thin tih a sawi.
“Kan thu thlen min ngaithlaksak thin tih hi kan hriat a ngai. Sawrkar laipui hmalakna a bawplawka do mai loa, Congress party kan pawm ang hian BJP pawh political party pakhat, India ram hmasawnna atana nupui pawh nei duh loa ram tana inpe hruaitute an nihna hi Mizoram mipui hian kan hriat a ngai a. Chu an inpekna rah chu ram pum hian kan chhawr ta mek a ni,” a ti.
BJP State Executive Meeting-ah hian district hrang hrang atanga agenda lut bakah economic resolution leh political resolution pharh chu sawiho niin, siamrem ngai siamrem hnu ah pass a ni.