Tarang Shakti 2026-ah US-in F-35A telpui dawn
Asia-a ram hrang hrang thlawhna sipaiten nunchan an zirhona lian ber, Tarang Shakti 2026-ah Indian indo thlawhna zingah a vawi khat nan US F-35A a tel ve dawn a. Stealth fighter hi French Rafale leh UAE F-16 te nen an chetla dawn a ni.
Kumin nunchan zirna hi chu Indian Air Force (IAF)-in Inrinni atanga October 12 thleng Jodhpur, Rajasthan-ah a thleng dawn a ni.
IAF hian a tel turin a thian tha ram 65 a sawm a, heng zinga pasarih chuan an hmanraw neih that ber ber nen tel an remti tawh a, ram 32 chu observer angin an tel dawn bawk tih Vice Chief of Air Staff Air Marshal Ashutosh Dixit-a’n a sawi.
Ram dang atanga tel tur zingah hian US-in an nghahhlelh tak, F-35A a thawh chhuahpui dawn tih a sawi a. F-35A hi paruk leh KC-135 pahnih an tel a beisei thu a sawi a. France-in Rafale pasarih, A400m pathum leh MRTT pahnih an lantir bawk ang.
UAE chu F-16 paruk leh Global 6000 pakhat nen an tel ve dawn a. Australia-in C-130 leh Germany-in A400M pahnih a thawh chhuahpui dawn a. India thenawm atangin Bangladesh sipaiten C-130J leh Sri Lanka atangin King Air 350 pakhat ve ve nen an tel bawk ang.
Observer ram tur zingah hian Cambodia, Egypt, Ethiopia, Japan, Indonesia, Italy, Laos, Malaysia, Maldives, New Zealand, Nepal, Oman, Philippines, Singapore leh Vietnam te pawh an tel.
A tel tur ram hi 40 dawn an ni tawh tih Air Marshal Dixit-a chuan a sawi a. Russia, China, Israel leh Saudi Arabia pawh sawm an ni a, an tel ve dawn loh chhan hi nunchan zir dan tur te, India leh a tel tur ramte azir a nih thu a sawi.
Nunchan zir hian chawlhkar thum dawn awhin vansanga indona awmah ruahmanna tha leh thawhhona nena beih dante lantir a ni dawn tih a sawi.
A thlengtu, India chuan Rafale, Su-30MKI, Tejas, Jaguar, MIG-29, MI-35, MI-17, AWAC bakah helicopter, transport aircraft, airborne surveillance leh refuelling platform hrang hranga a thawh chhuahpui dawn.
India hian kum 2024 khan Tarang Shakti hi a vawi khat nan a huaihawt a. A hmasa berah hian ram 11 atangin thlawhna 45 inlanin mission 76, sorty 867 leh darkar 1,180 chuang thlawh a ni tih Air Vice Chief chuan a sawi.