Taylor Swift-i’n backstage-ah Prince William leh a fate a selfie pui

Taylor Swift chuan a Eras Tour neih mekah London a thleng ta a, London-ah hian lal chhungkaw lam pawhin an lo lawm hle a, Swift hian Wembley Stadium backstage-a Prince William leh a fate- Prince George leh Princess Charlotte leh Travis Kelce te nena an selfie chu a social media-ah a phochhuak.
Prince of Wales hian Zirtawpni kalta khan a kum 42 tlin champha a lawm ve chiah a, a pianchampha lawm nan Swift concert hi a fate nen an chhim a nih hmel a, a nupui, Kate Middleton erawh cancer treatment la mek a nih vang nge a tel lo va, an fapa dang Prince Louis pawh a tel lo.
Swift hian a ngaihzawng Travis Kelce leh Prince Williams leh a fate a selfie puina thlalak chu Instagram-ah post-in, Prince William pianchampha lawmpui nan, “Happy Bday M8! London show chu bul kan fuh khawp mai,” a ti.
Prince William pawhin Swift leh an pafa thum thlalak dang cu Prince & Princess of Wales official Instagram account-ah a post ve bawk a, he thlalak-ah hian Swift te nen selfie tura an in-pose lai, Swift-i’n selfie tura a phone keng chunga a phar chhuak lai a ni ve thung. Prince William hian a caption-ah, “Thank you @taylorwsift zan hlimawm tak a ni! #LondonTSTheErasToure,” tiin a caption a dah ve bawk.
He concert-ah hian Prince William hi inhmuam up reng bik lovin, Taylor Swift hla hit ‘Shake It Off’ tih hla te pawh a suk pui nghawng nghawng lai video clip te pawh hmuh tur a awm.
Swift leh Prince William te hi an intawn vawi khatna a ni tawh lo va, 2013 khan Prince William leh Jon Bon Jovi leh Taylor Swift te hi Kensington Palace, London-a charity gala-ah stage-ah a lo zaipui ve ngat tawh kha a ni a, chumi tum chuan Bon Jovi hla hit ‘Livin’ on a Prayer’ an saho nghe nghe a ni.
Swift hian Wembley Stadium-ah hian show vawi thum, June ni 21-23 a nei a, heng show tum thum a neihah hian Paramore chu special guest an ni a, a zan khatnaah METTE chu show kick-off-tu niin, Griff leh Benson Boone ten a zan hnihna leh zan thumna an chang ve thung.