Team lian France an chak

World Cup 2026 khelh meka team ngaihven hlawh, football ngaihventute hmuh chak France chu June 16, Thawhlehni zan khan an inlan ta a, Senegal an hmachhawn. Senegal lakah Kylian Mbappe goal hnih thun hmangin hnehna an chang. An ram chakpuitu Mbappe chuan Olivier Giroud record khumin World Cup-ah France record thar a siam.
Senegal an hmuhnawm hmasa
Afcon 2021 leh 2025 champion Senegal chu Africa khawmual champion niawm rengin an inlan a, Football a ram lian France an ngam hle. Senegal hian hlau map lovin Feren ho an hmachhawn a, khelh pawh an khel tha hle. Chawlhlawk hmain team hmuhnawm zawk an ni a, goal thun theihna hun tha pawh an ngah zawk.
France player ropui tak tak, Kylian Mbappe, Ousmane Dembele, Miachael Olise leh Desire Doue te awmze nei lova siamtu Senegal tan hian Nikola Jackson chuan goal a thun teuh hle a, goal post a pet per dawp. Ball per let leh hian si nghak Mike Maignan ke fuh bawk mah se goal pawnah mak tak maiin a lumchhuak hlauh a, France an him hlauh. Chawlhlawk dawn hnaihah Senegal tan Ismaila Sarr chuan goal thun theihna hun remchang tha zet mai hmu leh bawk mah se goal chungah a petchhuak luah a, uiawm takin a hun tha neih a hlah ve bawk. Inkhel hmuhnawm takah hian chawlhlawk hmain goal lut a awm thei lo phawt.
France an inlar ve ta
Coach tha leh tawnhriat nei tha Dedier Deschamps an neih France in an hlawkpuia, an khingpuite aiin chawlhlawk an hmang tangkai zawk. Chawlhlawk hnu lamah team thar hlak ang maiin an inlan a, an hlauhawm ta hle. Dembele an thlak hnu phei chuan an hlauhawm leh zual a, goal thum ngawt an thun ta hial a ni.
France te anga team tha laka chak duh chuan mit khap kar lek inthlauhdah emaw, tihsual zeuh neih emaw a pawi thui thei hle. Chawlhlawk hmaa khel tha tak Senegal an talbuai zeuh a, an tuar. Michael Olise ball pek fing leh fuh tak mai chu finishing tawih em em mai Kylian Mbappe chuan rang takin a um lut a, talbuai hauh lovin a pet goal a, minute 66’-naah a pet goal a, hmahruaina goal a thun.
Hmahruaina goal an thun vangin France an phur a, an khel tha hle zual. Bayern Munich tana season hmang tha tak Michael Olise chuan fing leh fuh zetin Bradley Barcola tan ball a pe. Bench atanga lut Barcola hian inringtawk taka khalh rem hmasa te tein, si nghak Mendy a pet khum zet a, minute 82-naah an goal hnihna a thun a, an hmahruaina a tizau.
Si hniha an hnufual hnuin Senegal in an si phurh sut ngei tumin tan an khawh a, an goal thun pawm a nih loh hnuin Ibrahim Mbaye chuan minute 90+5-ah pui zetin a pet goal a, an si phurh a sut then. An goal thun vangin lawm viau mah se an lawm rei lo hle. Goal an thun atanga minute khat hnu lekah an tihfuh tawk loh vangin Mbappe chuan goal ropui a thun zui leh ta mai a, France chuan Senegal lakah 3-1 in hnehna an chang zui ta a ni.
Mbappe a ropui zual zel
Senegal laka goal hnih thun Kylian Mbappe chuan France tan vawi 99 khelin goal 58 a thun tling a, France tana goal thun hnem ber ni thin Olivier Giroud record a khum. World Cuo-ah ngei record a siam hi a hlu leh zual hle ngei ang. Mbappe hi League-ah season 8 chhung ngawt Top-scorer a nih zawn tawh a, World Cup 2022-ah top-scorer a ni bawk.