Telengana leiverha tangte chhanchhuah tumin bei zel

Telengana leiverha tangte chhanchhuah tumin bei zel
Nagarkurnool district, Telangana-a leiverh chima tang hna thawktu mi pariatte chhanchhuah hna thawh mek zel a ni a, chirhdirk chhah tak leh tui metre 200 vela thui awm chuan hna thawh a tisawt lo hle.
Inrinni tuk khan Srisailam tuikhuah bula km 44-a thui leiverh hi a chung a chim a. A chhunga thawktu eng emaw zat chu tlanchhuak hman mah se tui put tihtawp tuma thawktu mi pariat an tang.
An tan atanga darkar 24 liam hnuah pawh biakpawh theih an la ni lo va, a hma nia chhiatna a thlen rualin an inbiakpawhna thin a chhe ve nghal a ni.
Pathianni khan NDRF team li chuan a hmun hi an pan leh mek a, a awmsa mekten chhanchhuah tumin an bei mek reng bawk.
Hriat theih chinah thawm awm dan avangin a chung atangin lung lian tak tak a tla niin an hria a, a bang vel atangin tui a put bawk a, hei vang hian chhanchhuak tur hian tui tling mek paih kang phawt a ngai dawn niin an ngai.
A chung chim hi metre 200 vela thui niin an hria a, leiverh luhka atanga km 13 chuanga hlaah a ni bawk.
Video thehdarhah chuan Pathianni zingah khan chhanchhuah hna thawktute hian a tang mekte chu an ko va, hei hian an awmna lai tak hriat theihnaah a puih beisei a ni.
NDRF thuneitu pakhat chuan Inrinni zan khan a chhungah rescue team an lut a. Km 11 vel locomotive hmanga lutin a bak km 2 chu conveyor belt nen an lut a. “A thlen theih tawp an thlen chuan mi tangte chu an ko vak vak a, chhanna erawh an dawng lo,” a ti.
Leiverh chhung hi tuiin a luah nasa hle a, lung leh lei tla a tam em em bawk a, hei hi then phawt loh chuan mi tangte awmna hi hriat a theih rih dawn loh niin a sawi bawk.
Telengana-a leiverha chhiatna thleng hi state leh sorkar laipuiin an ngaihven reng a. Union home ministry chuan state sorkar leh a kaihhnawih department biain puih an ngaihna laia pui turin a inhuam reng tih an hrilh.
Inrinni tlai khan Telangana Chief Minister Revanth Reddy chuan thil thleng hi Irrigation Minister N Uttam Kumar a sawipui a. Hetah hian State Adviser (Irrigation) Adityanath Das leh Adviser to the Chief Minister Vem Narender Reddy te pawh an tel.
Chief minister chuan thuneitute chu chhanchhuah hna thawk rang tura ngenin a tuartu chhungkuate pawh sorkarin a puih tur thu a sawi a. Hna thawk mekah department tinte chu a tul anga che chhuak tura inpeih turin a ti bawk.