Tha zawkin kal tum…

Chief minister Lalduhoma chuan, ram hmasawnna leh mipui rawngbawlna tinrengah, kum 2026-ah chuan a hma aia tha zawkin sawrkar a kal dawn, tih a sawi a. Hei hi ‘kum thar resolution’ a tih theih ang.
Ram hmasawnna hna thawh nana pawimawh hmasa ber chu ‘sum’ a ni awm e. Kum kalta kum tawp dawn ruaia chief minister hova thukhawm, Mizoram Resource Mobilisation Committee chuan, Aizawl khawpui chhunga sumdawnna kalpuitu GST registration nei thei tura ngaih, registration la nei lo zawn chhuah hna Aizawl City Local Council Association nen tang tlanga thawh an rel a, taxation department-in an bawhzui dawn a.
Mizoramin GST Act 2017 kan nei a, 2018 atangin kan hmang tan a, kum 7 chu kan kalpui ve ta. Tun thlenga GST registration la nei lo engemaw zat an la awm thei te, zawn chhuah chawp ngaia kan la awm te hian, Mizoram resource kan ngaihpawimawh lohzia a tarlang a. Awlsam tea system fel tak siam a, chumi hmanga fel taka kal theih a nih hmel a, chu chu a la thleng dik thei lo a ni ber.
He kan system fel loh vang hi a ni ang a, kum kalta sawrkar kum thar April-June chhunga GST atanga sum hmuh kha a tlahniam ta duai a. A tlakhniam dan pawh hi a nasa viau a, April-June 2024 chhunga hmuh aiin cheng nuai 3,215 zetin a tlem zawk ta a ni. Kum 2024-ah pawh khan a hma kum 2023 April-June chhunga hmuh aia a tlem zawkna chu cheng nuai 1,889 zet a lo ni tawh bawk. A tlahniam zawngin kan kal a nih chu.
Kan hria a, Mizoramin kan kutkawih atanga sum hmuhna sum hnar tha kan nei ve lova, sawrkar laipui atanga kan dawn tur ang bituk hrang hrang kan hmuh tlingkhawm hi kan nunna hnar (life-line) a ni mai a, chutih laia kan resource tha tak GST lama tan kan la taima lo riau mai hi a pawi hle a. Tuna chief minister thusawi, ‘tha zawkin kal kan tum’ tih huang chhungah hian, GST hian top priority a luah a ngai ta ni berin a lang.
Office file kalkawng chungchang pawh hi, kumthar resolution zinga ngaih pawimawh hmasakah awm thei se a duhawm. Administrative Reform Commission 2019-in, ‘file-in officer dawhkan pali chauh kaltlang tura rawtna’ a lo siam tawh chu MRMC hian tlema her rem deuhin, department thenkhata enchhin turin DP&AR lama thlen an rel a. Hei pawh hi kum a thar ta bawk a, rikpui nghal phat atan a duhawm hle mai. DP&AR lam hian chak takin han bawhzui teh se.