Thai leh Cambodia ramria inkahnaah mi 12 thi

Thai leh Cambodia ramria inkahnaah mi 12 thi
An ramri buai mekna hmuna Thai leh Cambodian sipaite inkahnaah mi 12 vel an thi niin Thai thuneituten an sawi.
Asia chhimchhak ram pahnih hi ku 100 chuang ramri-ah hian intibuai tawhin tun hnai hian an inep thar nasa hle.
Thailand-a sipaite chuan thi tam zawk hi Thai province pathuma civil mite deuh vek an ni tih an sawi a, mi eng emaw zat an hliam bawk niin an sawi a. Cambodia hian thi leh hliam an nei ve em tih an la sawi ve lo.
Ram pahnihte hi Ningani hma takah inkapin a kap hmasatu-ah an inpuh taw a. Cambodia-in rocket-in an kap nia Thailand-in a sawi hnu lawk atanga boruak tang zualin Bangkok hian Cambodian sipai hmunte thlawhna atangin a kap zui.
Thailand chuan ramri a khar nghal a, Cambodia pawhin Thailand chu sipai chakna uchuak taka hmanga puhin an inpawhna a tihniam bawk.
Ram pahninhte hian an ramri chhehvela chengte chu insaseng tura tiin Thailand hian mi 40,000 chuang hmun himah a sawn.
Thai thuneitute hian naupang kum riat leh ku 15 telin civil mi 11 leh sipai pakhat chu Surin, Ubon Ratchathani leh Srisaket province-ah an thi tih an sawi.
Thailand leh Cambodia hian thil thleng an sawi dan hi a inang lo.
Thailand hian Cambodia sipaiten ramria Thai sipai awmte thlithlai nana drone an hman atangin boruak hi a tang tan niin an sawi.
Cambodia chuan Thai sipaite hi an inremna bawhchhiain ramri hrula Khmer-Hindu temple bulah an lut zawk niin an sawi ve thung.
Ram pahnihte hi kum 100 chuang kal tawha French-ten Cambodia an awp an chhuahsan dawna ramri a rinsak atangin an buai tawh.
Kum 2008 khan Cambodia hian kum zabi 11-naa mi tawh, ramri buai laia temple, Unesco World Heritage Site-a tel chu an rama rin luh an tum atangin an buai zual tan a, he thil hi Thailand chuan a duh lo hle a ni.
Hemi hnuah hian sipai leh civil mi thihna a thleng zeuh zeuh tawh.
May thla khan intihbuaina chhuakah Cambodian sipai a thi a, hei hian kum tam tak chhunga ram pahnih inkar chhiat ber lai a thlentir.
Thla hnih liam ta chhungin ram pahnih hian ramri khuahkhirhna hrang hrang an kalpui a. Cambodia-in Thailand atanga thei leh thlai a lak luh titawpin power leh internet service a lak pawh a titawp bawk.
Ramri-ah hian lehlam lehlam hian sipai an dah belh teuh bawk.
Thailand-a prime minister nihna chelh lailawktu, Phumtham Wechayachai chuan Cambodia nena an buaina chu a ril a, fimkhur tak leh khawvel dan zawm chung zela hma an lak tur thu a sawi.
Cambodian Prime Minister Hun Manet chuan an buaina chu muanawm taka chin fel an duh tih a sawi a, hetih rual hian ‘ralthuam nena min tih chuan duhthlan tur dang a awm bik lo’ tih a sawi.