Thailand Prime Minister thar thlang dawn

Thailand Parliament chuan karleh khian an Prime Minister thar tur an than leh tur thu a sawi. Deputy Speaker chuan parliament in PM tur thlanna hi July ni 19 ah neih a nih tur thu hi a puang chiang tawh a ni. July 13 khan Thailand parliament chuan PM tur thlanna hi lo nei tawh mahse tling zo an awmlo a ni.
May 2023 khan inthlanpui hi lo nei tawhin Move Forward Party te chuan hnehna chang zo lovin an hruaitu Pita Limjaroenat chuan PM ni tura vote ngai zat a hmu tling zo lo a ni. Thailand ah PM ni tur hian party thlan zinga lian ber atangin parliament ah vote 376 hmuh a ngai a ni. Thailand parliament in hnih ah hian House of Representative in vote 500 leh House of Senate in vote 250 an nei a, Pita Limjaroenat hian vote thlak hmasak ah vote 324 a hmu a ni.
Deputy House Speaker Pichet Chuamuangphan-in AFP a hrilh danin inthlan vawi hnihna tur hi July 19, 2023 ah neih leh a ni anga hetah hi chuan Thailand hian Prime Minister thar an neih ngei tawh a beisei thu a sawi a ni. Tuna PM ni mek Prayuth Chan-ocha chuan politics atanga a chawlh thu July 11, 2023 khan a puanga, PM thar an neih hma chu PM lailawk a lo ni rih dawn a ni.
Move Forward Party leh a thurualpui te hian May 2023 inthlan ah mipui atangin tantu an nei tha em em a, kum 10 dawn lai rorelna lo siam tawh sipai thlawp sorkar chu an rawn paih thla thei hial a ni. Thailand parliament a vote thlak a nih hnu hian election buaipuitu lam chuan Constitution Court ah zualko in Pita Limjaroenat chu MP atanga paih turin an zualko a, hei hian senators vote tam zawk Pita hi a mamawh belh tir leh a ni. Karleh inthlan tur ah hian Pita hi candidate turin an rawt nawn leh ang nge, PM ni tura candidate pahnihna atan an chhawp chhuak choh ang tih hi a la chianglo a ni.