Thana duty-ah vuivaina thawm a awm – Home minister

On Sep 21, 2026 1 0

Tunhnaiah ‘Thana’ a police duty-ah mipui lam atangin vuivaina thawm a awm thin nia sawiin, SP tinte tan la turin Home minister-in a chah.
Mizoram Police Service Association intawhkhawm a hmanpuinaah Home minister K Sapdanga chuan, Mizoram Union Territory a nih, kum 1972 atanga chhiara kum 54 chhung hian Mizoram Police-in dan leh thupek kenkawh kawngah leh hnuchhui kawngah sulhnu chhuanawm tak tak an hnutchhiah a. Mipui rawngbawl saktu sawrkar hnathawk rau rauah police hian mipui mit an la bik a, an laka mipui beiseina a sang bik a, an lakah mipui thikthu pawh a chhe bik tih a sawi.
Mipui rin an kai chuan an thawh rah a ni anga, mipui rin an kai loh pawhin anmahni vang tho a ni dawn, tiin, police zingah pawh officer-ten mipui lakah mawh an phur lehzual a, mipui hriat phaka an tawngkam leh mipui hmuh phaka an chezia an fimkhur hle a ngai tih a sawi a ni.
“Mipuiin police an mamawh huna an tlukluhna hmasa ber chu police station leh outpost, ‘Thana’ kan tih mai hi a ni a. Thana-ah hian kan police pumpui hmel kan pholang thin. Tunhnaiah Thana duty-te laka vuivaina thawm a awm ta fo a. Police tanpui beiseia pantute kan tibeidawng thin a ni maithei. District SP-in kan police station leh outpost enkawl kawngah tan lak a ngai a. Mipui mangang lo dawnsawn danah chauh ni loin, vawnfai leh vawnfel kawngah pawh tan lak a ngai,” a ti.
Thana chu citizen-friendly thei anga infrastructure thuam dan ngaihtuah turin Home minister hian police hotute a chah a. Police station leh out post tan fai intihsiak siam a, tunhma lama hmun fai tehfunga police station hman thin kha neihlet tum turin a fuih.
Tunhnaiah technology kaihhnawih cyber-crime lam chi a pung ta hle a. Mizoram sawrkar pawhin hemi kawngah hian a theih ang angin tan a la a, hmabak erawh an la nei nual tih a sawi a. Police officer zingah science & technology kaihhnawih thiamna nei an thahnem hle a, thlamuanthlak a tih thu a sawi.
Ruihhlo man kawnga an thawh ropui tak chu a chhuanawm tih K Sapdanga hian sawiin, Myanmar atanga local kuhva rah khuahkhirh kawngah Mizoram Police an thawk tha hle a, an sipaiten huaisen taka heng hna an thawh theih chhan chu officer-ten huaisen tak leh awmze neia an kaihhruai thin vang a ni tih a sawi.
“Dan leh thupek kenkawh hna tha taka thawk thei tur chuan, community participation hi tihmakmawh a ni. Mizoram hi khawvelah community force nei tha ber pawl kan ni hial ang. Chu mai a ni loa, community force-in sawrkar a puihbawm that berna pawh Mizoram hi a ni hial awm e,” Home minister hian a ti a. Hei hi hmang tangkai thiam turin police hotute a chah.