Thawhchhuah phu loa khawsate endawng thiam turin YMA inchah

Thawhchhuah phu loa khawsate
endawng thiam turin YMA inchah
Hlemhletna do kawngah kut tling lo leh thawhchhuah phu loa khawsate endawng thiam turin YMA an inchah.
2022 October 27-a YMA Rorel Inkhawm vawi 3-na Thingsulthliaha neiha thurel – YMA Khawih No.2 “Eirukna leh hlemhletna a reh theihna’n Central YMA-in tun aia chak zawkin hma la rawh se,” tia lo rel tawh chu YMA Central Coordination Committee (CCC) thukhawm chuan hmalak tawh dante a thlir a. Mizorama eirukna leh hlemhletna a reh theih nan Sub-Hqrs./ Group/ Branch ten mahni huamchhungah chak zawka hma lak zui nise, a ti a. Kut tlingloa sum lalut leh thawhchhuah phu loa khawsate endawng thiam nise, a ti.
Eirukna leh hlemhletna chungchanga court rorelna leh corruption buaipuitu Special Judge thuremnaah lawmawm a tih thu CCC hian a sawi a. ‘Kan ram leh hnam tana a hnathawh zelnaah Court leh Special Judge-te YMA chuan a thlawp zel dawn,’ a ti. Hlemhletna do turin mipui a sawm nawn a ni.
Mizorama hnamdang hnena in hmun, huan lo ram lei leh hralh emaw hlan chhawn zel emaw a nih loh na’n in hmun/huan /lo/ram hralh leh hlan chhawn a nih dawnin YMA hriatpuina telh zel a nih theihna’n Central YMA-in hma la rawh se, tih pawh chak taka hma lak zui zel nise, sawrkarah RTI dan hmangin Mizorama hmun leh hmate hnamdangin an neih tawh dan zawh chian nise, dan hman lai – Revenue Act 2013 pawh chiang zawka zirchian nise, an ti.
Sawrkar khawih zingah, Mizoramin Market Regulations a neih chu a taka hman a nih theihna’na hma lak, Mizoram hmun hrang hranga sawrkar damdawi in te hmanraw tha zawk leh thawktu tam zawka thuamtha tura ngen bakah Mizorama vocational course zirna tun aia uar zawka kalpui dan turte rel a ni.
Myanmar atanga raltlante hmun hrang hranga an awm darh lutuk chuan harsatna lian zawk la thlen thei dawna a lan avangin sawrkarin relief camp changtlung zawk siam tur leh chumi ah chuan dah vek tura sawrkara chak zawka hma la tura nawr zel, tihte a tel bawk.
Central YMA-in ‘theka rate’ a siam chu hman a nih theihna’n Aizawlah hma lak zel nise; Sub Hqrs. YMA ten an huamchhung district theuhah hman turin lo zirchiang ve se, an ti.