The Grand Gandhi Jayanti Exhibition buatsaih dawn

Mizoram larsap Dr. Hari Babu Kambhampati ruahman angin India Hnam Pa Mahatma Gandhi piancham denchhenin Governor Secretariat leh Commerce & Industries Department tangkawp chuan October ni 2 atanga ni 4 chhung hian Circular Lawn, Raj Bhawan-ah The Grand Gandhi Jayanti Exhibition an buatsaih dawn tih Florence Zotluangpuii, Director, Commerce & Industries Department chuan a sawi.
He exhibition-in a tum ber chu Mahatma Gandhi-a’n mahni tualchhung siam chhuah hmanga intodelh a, ramchhung thil siam chhuah te atam thei ang ber hman pawimawh a tihzia leh tualchhung siam chhuah thil chi hrang hrang uar chhunzawm zel a tulzia tih lanna tur a nih thu Florence Zotluangpuii chuan a sawi a. He exhibition-ah hian tualchhung siam chhuah handloom leh handicrafts thil chi hrang hrang lei tur a awm dawn bakah ei tur chi hrang hrang lei theih turin food court ruahman a nih tur thu sawiin, stall hrang hrang 52 awm tura ruahman a nih thu a sawi bawk.
He hunah hian Mizoram Rural Bank-in Central Sawrkar hnuaia Ministry leh Department hrang hrang te hnuaia hamthatna chi hrang hrang, kut hnathawktuten an hman tangkai theih tur te phochhuahna bakah bank dawr dan kalhmang inhrilhfiahna turin stall an hawng dawn tih Florence Zotluangpuii chuan a sawi a. Science & Technology Govt. of Mizoram ten Zopuan App hmanga mizo puan design hrang hrang siam dan tur awmna an duang te pholan a nih tur thu a sawi bawk.
Florence Zotluangpuii chuan India ram Prime Minister in India ram kutthemthiamte chawikanna tura PM Vishwakarma scheme a tlangzarh tak chungchang hrilhfiah turin LESDE chuan stall an hawng dawn tih sawiin, he exhibition buatsaih nan hian Office of the Development Commissioner for Handlooms, Ministry of Textiles, Govt. of India atangin cheng 11,99,950 an dawn thu a sawi a. He exhibition tlawh tur hian mi zawng zawng an sawm tih sawiin, Larsap chuan exhibition tlawhtute’n tualchhung thilsiam an pho chhuah te chu lei theuh turin mipuite a ngen tih a sawi bawk.