Thisen vawi 100 pe tling thei pualin thisen unit 100 an pe

YMA Electric Veng Aizawl chuan an member C Lalremruata’n thisen vawi 100-a pekna pualin Zirtawpni khan branch pum huap thisen pek runpui an buatsaih a, unit 100 an pe.
He hun hmanpuitu Health minister Lalrinpuii chuan, tunlai khawvel changkang tawh takah pawh thisen hi mithiamten an la siam chhuah theih loh avangin a hlu em em a, vawi 100 thisen pe thei Tv. C Lalremruata a lawmpui a, a inpekna hlenchhuak theia damna leh hriselna a nei chu vanneihna bakah mahni invawnna nia a hriat thu a sawi.
“Thawktu thiam tak tak neiin khawl tha leh changkang tak tak nei pawh ni ila tlawmngaia thisen petu an awm si loh chuan chhawr tangkai lohin an awm dawn tihna a ni. Midang tana thisen pek hi a pawimawh em avangin kumtin World Blood Doner Day hman thin a ni a, kan mihringpuite nun chhann atan leh an nun pawhsei sakna atan thisen pek a ngai thin a, tun aia kan uar deuh deuh a ngai a ni,” a ti a. Mimal, thianho leh pawl anga thisen pek bakah pian champha emaw pass lawmna pual emaw ni pawimawh kan nuna thleng hrang hrang hmangin emaw midangte tan thisen pek hmangin luanchhuah uar deuh deuh turin mipui a sawm tih a sawi a ni.
Thisen vawi 100 pe tawh C Lalremruata chuan, kum a tlin hmain damlo chhungten thisen pe turin an ngen a, a la pe thei si loa, hreawm a ti em em a. Kum a tlin hunah a mamawhtute tan thisen a tam thei ang ber pe turin rilru a siam a, tun dinhmun thleng tur hian a intiamna chuan a nawrkal niin a hria tih a sawi. Mizo thalaite chu hriselna ngaipawimawh a, mahni invawng thianghlim tur leh midangte tan a tam thei ang ber thisen pe turin a sawm tih a sawi bawk.
Electric Veng chhunga tlawmngai pawl hrang hrang, thianho leh mimal hmingin C Lalremruata hi lawmpuina thilpek an hlan bakah Health minister hian sumfai a hlan bawk.