Thla hnih chhungin khaw lum vangin Spain-ah mi 1,180 thi
Thla hnih chhungin khaw lum vangin Spain-ah mi 1,180 thi
Thla hnih liam ta chhungin Spain-ah khawlum lutuk avangin mi 1,180 thihna a thleng a, nikum tun ang hun aiin a tam hle tih environment ministry-in Thawhtanni khan a sawi.
Thi zinga a tam ber hi kum 65 chung lam an ni a, a zahve chuang chu hmeichhia an ni bawk tih sorkar chhinchhiahnaah tar lan a ni.
Khaw lum uchuak avanga thihna hi Galicia, La Rioja, Asturias leh Cantabria region-ah a tam ber a, heng hmunte hi an ram hmar lam zahve vel huam chhung niin nipui laia hmun nuam thin a ni a; mahse, tun hnai kum eng emaw ti kal ta atang khan a kum telin a lum telh telh.
Europe khawmualpuia khawthlang lam ram dangte ang bawkin Spain-ah hian tun hnaiah khaw lum uchuak tak an tuar a, hmun thenkhatah chuan 40°C thlenga lumte pawh a awm.
May 16 leh July 13 inkar khan khaw lum lutuk kaihhnawiha thi 1,180 chhinchhiah a ni a, nikum hetiang hunah khan mi 70 an thi thung tih ministry chuan Carlos III Health Institute-in a chhinchhiahna a puang a. Thi hi July chawlhkar khatnaah khan an tam zual tih a sawi bawk.
Chhinchhiahna chuan khaw lumah hian ‘ni a sa na em em a, khaw lum lam chawhrual chu rinphak bakin a sang zel a, thihna a thleng ta teuh a ni’ tih ministry chuan a sawi a ni.
Thla hnih chhung hian khaw lum uchuak thleng tur inralrinna chu vawi 76 tihchhuah a ni a, nikum hetiang hunah hian red alert tihchhuah engmah a awm lo thung.
Nikum nipui chhung zawng khan Spain-ah hian khaw lum kaihhnawiha thihna 2,191 a thleng angin sorkarin a chhinchhiahnaa a hman, Carlos III Health Institute chuan a tar lang.
July 9 khan mi thiamten an chhut leh zirna an tihchhuahah July 2 atanga chhiar let ni 10 chhungin Europe-a khawpui 12-ah khaw lum lutuk kaihhnawiha thi mi 2,300 vel an awm tih tar lan a lo ni tawh a, Spain hian an ram chhunga thil thleng an chhinchhiahna an puang zui veleh a ni.
Spain-in chhinchhiahna atana a hman leh Imperial College London leh London School of Hygiene & Tropical Medicine-a scientist-ten chhutna atana an hman hi thuhmun leh chhut dan inang a ni em tih erawh hriat a ni lo.