Thla kaw chhungin heroin man hnem

September a liam a, Mizoram Excise & Narcitics (MEN) department-in thla kaw chhungin heroin kg 37 chuang an man tawh!
2019-ah khan kg 12.596 an man a, a hun lai chuan heti lam veite mak tih a tling. 2019 hi kum khat chhunga kg 10 an man tlin vawi khatna pawh a ni.
2022-ah khan heroin a hluar tih hi tlang hriat a tling a ni mai lo a, titi a tling. Vei pawh a hlawh a, heti lam veite chu an mangang tia sawi theih tur a ni. Khami kumah khan kg 33.418 an man a, hei pawh mak tih tham a ni. Mahse kuminah thla kaw chhungin chu aia tam fe chu an man tawh.
MEN department hian kuminah September ni 30 thleng khan kg 37.075 an man tawh a, thla kaw chhunga manah chuan a tam hle.
Nikum khan kum tluanin kg 79.359 an man a, hei hi an man tam ber kum a ni.
MEN department hotute chuan Manipur buai leh heroin man tur pung hi inzawmin an hria a, Manipur-a lut tur hi Mizoram lamah a kal ta niin an hria.
Khawchhak lam atanga ruihhlo lakluh, hmun hrang hranga mi tur hi Mizoram leh Manipur kaltlang a tam a, Manipur an buai hnu hian Manipur kaltlangpui thinte’n Manipur luhpui ngam lovin Mizoram lamah an luhpui nia rin a ni.
MEN department hotute chuan heroin man tur a tam tih hi a dik ngei a, mahse state danga mi tur pawh a tam tih an sawi.
Mizoramah heroin a hluar ngei a, mahse Mizoram heroin an manah hian state danga mi tur, Mizorama zawrh tur ni lo tih an sawi a, hei hian heroin man zat hi a titam lo thei lo tiin an sawi.
Heroin hi tunlaiin Mizoramah a hluar ngei a, khaw chengker deuhva ngaih thenkhat pawh a luh chilh nia sawi a ni. Aizawlah hian thingtlang atanga kal, riahna mumal pawh nei lovin khawlaia heroin leh ruih tur dang zawnga vak vel an pung tiin MEN department lam chuan an sawi a, tun hnaiah pawh khawlaia ruihhlo buaipuitute lam hi MEN department hian an hawi a, khawlai thenfai hna hi ngawrh takin an thawk a ni.