Thla tawp lamah khua a vawt hret

Thlasik lai a ni bawk a, Mizoram khaw hrang hrangah khua a vawt mek. November thla tawp lam a ni tawh a, thla tir lam leh thla laihawl aiin khua pawh a vawt ta.
November thla chawhnu lamah khua hi vawt tak chu la ni lo mah se thla tir lam ai chuan a vawt tawh a, zan lamah chuan vawt han tih viau theih te pawh a ni tawh.
Champhai leilet leh North Vanlaiphai-ah chuan vur a tla tia sawi theih turin, hmun thenkhat chu zing lamah a lo var vau thin a, Aizawl erawh vawt lutuk a la ni lo.
State Meteorological Centre-in an chhinchhiah danin, kuminah November thlaa a vawh ber laiin a tehnain 15°C a kawk a, a hniam tho na a, vawt tak chu a la ni lo.
Chawlhni liam ta November ni 23 khan a vawh ber laiin 15°C a ni a, a tuk ni 24-ah pawh 15°C a ni leh.
15°C hi a hniam lem lo a, mahse 15°C a nih ni-ah hian khua a lum lo; lum leh vawt tehnaah hian ni khatah a vawh ber lai leh a lum ber lai an chhinchhiah thin a, a lum ber aiin a lum vak lo a nih chuan a vawh ber laiin hniam vak lo pawh ni se khami ni khan mihringin khua a vawt an ti tho. November ni 23-ah pawh khan a lum ber laiin 20°C a ni a, Mizoramah ni khata a lum ber laia 20°C hi a hniam. Chuvangin khami ni khan khua a vawt a, zanah phei chuan mipui pawhin vawt an ti. November ni 24-ah pawh khan a lum ber laiin 24°C a ni a, 24°C hi a lum vak lo, chuvangin khami ni khan vawt tih awm tak a ni ve tho.
State Meteorological Centre enkawltute sawi danin, a lum ber laiin 15°C ni tho se, a lum ber laiin 28°C te ni ta se, khami kha a vawt vak lo ang. Ni khata a vawh ber aia 10°C, a lum ber laia 30°C aiin a vawh ber laia 15°C, a lum ber laia 18°C vel kha mihring chuan vawt an ti zawk thei an ti.
Kuminah Aizawl vawh ber laiin, January ni 9-ah khan 10°C a ni a, Mizoram thlasikah 10°C hi a hniam tia sawi tur khawp a ni lo. Tun hnai kum hnih, 2024 leh 2023-ah khan khua a vawt vak lo a, 10°C aia a hniam lai a awm lo ve ve.