Thlasik bazar tawp niah insiksawina
January ni 31, Thawhlehni khan UK ah chuan thlasik bazar khar a ni a. Thawhleh zan dar 11:00 thleng khan player lak leh hralh phal a ni. Thalsik bazar tawp ni khan chanchin ngaihven hlawh tak tak a awm nual a, chung zinga langsar zualte chu kan tarlang ang a. Heng kan tarlan te hi a tak ngeia thleng tawh a awm laiin, a then chu an indawrna a hlawhtling vek kher lo thei thung.
Bayern ah
Manager Pep Guardiola hnuaia duhsak hlawh zo tawh lo, Portugal defender Joao Cancelo chuan Manchester City chhuahsan lailawk in, German champion Bayern Munich a zawm.
Cancelo hian kum 2019 khan Italian Serie A club lian Juventus atangin Manchester City a zawm. City tan hian Premier League-ah vawi 98 a khel tling tawh a, City player pawimawh tak a ni thin. A khelh that thin vangin City hian kum 2022 khan kum nga daih contract thar ziahpuiin an thlung nghet a, kum 2027 thleng Etihad Stadium ah cham turin contract a la nei.
City ah Kum nga daih ngawt contract la nei bawk mah se a pawimawhna a hloh tak tlat vangin khelh tam theihna tur pan a duh a. German champion Bayern Munich chu loan in a zawm phawt a. Bayern hian Cancelo hi a ngheta an la duh a nih chuan nipui bazar inhawn hunah 70m euro (£61.5m) sengin an la lut thei dawn. Season liam taah EPL team of the year a hming lang phak Cancelo hi German Bundesliga-ah a vul thar leh theih ngei a beiseiawm.
Arsenal in Jorginho an dawr
Premier League-a hmahruai mek Arsenal chuan an squad thuam chak ngei tumin hma an la a. Brighton midfielder Moises Caicedo an lak theih loh hnuin Italy leh Chelsea midfielder Jorginho lam an hawi thut a. London a an elpui lian Chelsea hian Arsenal in £12m senga Jorginho lak an dilna an lo pawmsak a. Inremna tluantlin an nei thei ngei tura ngaih a ni.
BBC Sport in a tarlan danin Arsenal hian Jorginho hi thla 18 daih contract an ziahpui ang a. An duh chuan kum khat dang a contract an pawhseisak thei dawn bawk. Jorginho hian tun season daih bak Chelsea ah contract a nei tawh a, season tawp rualin a zalen thei dawn. A hralhna man tel hauh lova sezawl chhuah ngawt ai chuan Arsenal hnenah £12m zeta hralh hi Blues tan pawh tha viau tura ngaih a ni.
Arsenal midfielder thar ni ngei tura ngaih Jorginho hian Chelsea tan inelna hrang hrangah vawi 213 khel in, goal 29 a thun tawh a. Champions League, Europa League, Uefa Super Cup leh Fifa Club World Cup-ahte Blues hi a champion pui tawh nghe nghe. Club tan a khelh that thin vangin Italy player pawimawh a ni a, Italy tan hian vawi 49 a khel tawh a, Euro 2020 ah an champion theih nana player pawimawh a ni.
Chelsea hian Hakim Ziyech pawh Paris St-Germain lamah an tirh chhuah hmel viau bawk.
Chelsea in Fernandes dawr nawn leh
London club lian Chelsea chuan Enzo Fernandez lak tumin Benfica an dawr nawn leh a. Blues hian £105.6m zet sen an huam.
Chelsea hian World Cup-ah Argentina champion puitu leh rawlthar tha bera thlan ni bawk Fernandes hi an squad thuam chak turin lak an duh hle a. Jorginho a chhuak dawn bawk nen an mamawhna a san belh lehzual ta hle bawk. 120m euros (£105.6m) senga Argentine midfielder an la lut thei a nih chuan Fernandes hi British player manto ber a ni ang.
Porro leh Doherty
Tottenham Hotspurs chuan an tlarhnung thuamchak turin Sporting Lisbon defender Pedro Porro chu £42m sengin lak ngei an tum a. Porro hian Spurs zawm turin medical test a hmachhawn tawh. Hetihlai hian Spurs full-back Matt Doherty chuan Atletico Madrid a pan ve thung.