Hun awla lehkha chhiar tama kan thluak kan hman reng chuan hriselna atan bakah tar atna lakah min veng thei tih MLA Lalchhuanthanga chuan a sawi.
MUP Aizawl South-II Area Conference Thawhtannia neih chu Aizawl South-II bialtu MLA Lalchhuanthanga hian a hmanpui a. Conference hi session thum – inthlan, rorel leh kum upa chawimawina hunah te then a ni.
MLA chuan mihring chu inzir reng tur kan nih avangin kan damchhungin inzir tawp a awm lo a, inzir peih apiang an tha rei a, natna bik kan nei a nih loh chuan Mizoten “tar at” kan tih pawh an nei ve ngai lo tih a sawi. “Hun awlah lehkha chhiar tam ila, kan thluak kan hman reng hian hriselna bakah tar atna lakah min veng thei a ni,” a ti.
Kum upate chu kan hnam rohlu an ni, tiin, “Kan ram leh hnam kaihhruaina atan in tawnhriat hi a pawimawh em em reng a. Kan ramah kum upate inkawm hona emaw a bika inenkawlna emaw kan la siam ve thei lo. Kan society mila kan thiam dan hi a la tawkah kan ngai rih pawh a ni maithei e. Hun a lo kal zel anga, kum upate tan a bika inenkawlna kan neih a la tul ngei ang,” a ti.
MLA hian kum upate chawimawina thilpek a hlan nghal a. Conference-ah hian kalkhawmten zanriah an kil ho a ni.
Thluak hman rengin ‘tar at’ a veng thei – Lalchhuanthanga, MLA
Get real time updates directly on you device, subscribe now.