Thuawih lo te in thiahsak

National Highway (NH) 54 kawngpui sial hna thawhin an chenna in a tihchhiat dawn avanga zangnadawmna pek tawh, an chenna in thiahna tur thupek ‘eviction notice’ pawh pek tawh, la thiat duh lo leh insenghawi duh lo Zobawk South-a in pali chu Thawhlehni khan thiahsak an ni.
Lunglei district magistrate aiawhin assistant settlement officer, executive magistrate K Lalhlimpuia hoin hemi kaihhnawiha member dangte nen chenna in pali – C Lalroliana, F Lalrinawma, P Laldenga, Lallawma leh Hmingthanmawia in thiahsak a ni.
Lunglei district huamchhunga NH54 kawngpui sial mekin an chenna in a tihchhiat dawn avanga zangnadawmna an lo pek tawh, mahse in la thiat lo leh insaseng duh lo ho hi vawi tam thuneituten an in thiata insaseng turin an lo hriattir tawh a. Thupek zawm duh lo an la awm cheu avangin kumin March 5 atang khan sawrkar chuan hma a la tan ta a ni.
March hian Tawipui ‘S’ khuaa S Lalnghinga in thiat hmasa berin, March 7 khan Thualthu khuaa Hmangaihthangi, T Thanliana, Lalruata leh Rinawmi te in thiah leh a ni. Vawiin, March 20 hian Zobawk North ami Lalramnghaka in leh Dawn khuaa K Lalengliani in thiah leh a ni ang.