Time pass-na atana sawrkar siam mai mai an ang thin – MBJP president

Mizorama sawrkar kal tawhte enin, time pass-na atana sawrkarna siam mai mai an ang thin a, manifesto tihhlawhtlin tum aiin chhuanlam tur an zawng reng thin tih BJP Mizoram president Vanlalhmuaka chuan a sawi.
Zirtawpnia BJP State office-a inkhawmah Vanlalhmuaka chuan Mizorama sawrkar tawhte kalhmang enin, manifesto nei tha hle mah se, tih hlawhtlin theih loh avanga chhuanlam tur zawng reng sawrkar kan hrawn thinte hian mipui min tibeidawng a, kan ram leh hnamin a tawrh phah hle tih a sawi.
Modi kaihhruai BJP sawrkar chuan India mipui chu kawng thar hmuh tirin, kum 10 chhunga mipui tana an hnathawh rah avangin tun Lok Sabha inthlanpuiah pawh a hma aia chak zawkin sawrkarna an siam leh dawn a. An sawrkar leh chhan tur bul ber chu mipui hmaa an intiamna, ‘manifesto’ anga hna an thawh vang a ni tih a sawi a ni.
Party thenkhat, party dang manifesto ruksak a, mahni tih ang maia kalpui thin an awm tih BJP hruaitu hian sawiin, “BJP chuan party dang manifesto a ruksak ve ngai lo,” a ti.
Hindu party tiin sawi fo mah se, vawiin thlengin BJP president tawh te leh hruaituten chal an hnawihsen ve ngai loa, coconut an sawhkeh ngai lo tih a sawi. “Zoram mipui hmaa Hindu party-a min puhtu Mizorama Congress party hotupa chuan chal a hnawihsen a, coconut sawhkehin Durga Hindu pathiannu hmaah Hindu serh leh sang a khawih a ni. Min beitute hian Mizoram hi an hmangaih lo hle a, politics hi eizawn nan an hmang mai a ni tih a tichiang. Sakhuanaah phei chuan Kristianna hi an pawngsual reng zawk a ni,” a ti.