Title lak tuma hmalam pan zel Swiatek

Title lak tuma hmalam pan zel Swiatek
Top seed Iga Swiatek chuan Wimble-don title hmasaber tur a beisei mekna kawngah third round lutin, Centre Court-ah Spain player Sara Sorribes Tormo chu 6-2 6-0-in a sawp a, SW19 grass-a round lina la pel ngai lo Pole hian kum danga a thlen chin a hnaih leh sawt.
Kum 22 mi Swiatek hian hnehna a chan hnuah tunhma aia a inrintawk thu sawi chungin he grass tournament-a thil tam tak a zirchhuah hnua a kum hmasaber a nih thu leh a insiamrem chho thei ta tih a sawi a, hmalam hunah chuan Wimbledon hi a tournament la ni thei dawna a ngaih thu leh grass-a inzirna hun a tam loh avangin a thawhrim a ngai dawn tih a tarlang tel.
Swiatek chuan, “Kum tinin he tournament khelh hi a awlsam hret hret niin ka hria a, kumina ka inringtawk ta hle hi a ropui ka ti takzet a ni,” a ti.
Poland nula Swiatek hian first round-ah khan opening round-a player-in ranking-a a tum theih sang ber 34th-ranked Zhu Lin hmachhawnin, game li chiah a hloh a, chu chuan inrintawkna a siam ve pah bawk niin a lang.
Thla hmasa mai khan Roland Garros-ah Swiatek hian a major title palina hlawhchhuakin, grass-court game atan hian kum dang zawng aiin a inbuatsaih ngawrh a, karliamta khan Germany rama warm-up event-ah semi-final hial thlengin, a damchian loh avangin a inhnukdawk ta hlauh zawk a.
French Open-a vawithum champion tawh hian second round-ah harsatna tawk loin Sorribes Tormo a hneh leh a, chu chuan a inrintawkna a neihsan belh bawk niin a lang.
Wimbledon ni thumna inkhel dangah Greek eighth seed Maria Sakkari chuan American Coco Gauff hnungzuiin championship kal laia top-10 tla pahnihna a ni a, a tumpui world number 36 Marta Kostyuk chuan chiang zeta set hmasaber a hloh hnuah 0-6 7-5 6-2 hnehna a changlet.
Ukrainian Kostyuk kha open era Wimbledon-a set hmasa ber 6-0-a hloh zet chunga top-10 seed hnehlet thei hmeichhe player pathumna chiah a ni.
American world number 10 Frances Tiafoe chuan inkhel dangah Chinese Wimbledon debutant Wu Yibing chu 7-6(4) 6-3 6-4-in a hneh a; American ve bawk Taylor Fritz pawhin 6-4 2-6 4-6 7-5 6-3-in Yannick Hanfmann a paltlang.
World number two Anett Kontaveit chuan 6-4 6-4-in Italy player Lucrezia Stefanini a hneh a, Wimbledon a khelh zawh ruala tennis inelna chawlhsan tum Estonian-in round thumna a lut ta phawt.
6-2 6-3-a Sweden star Rebecca Peterson hnehtu 2017 US Open champion Sloane Stephens leh Chinese Wang Xiyu laka 6-4 3-6 7-5 hnehna chang tleirawl kum 16 mi Mirra Andreeva pawhin second round an paltlang ve bawk.
Wimbledon-a vawihnih champion tawh Petra Kvitova chuan Centre Court chung khuh hnuaiah first round khelin Jasmine Paolini a hneh ve bawk a; Brazilian 13th seed Beatriz Haddad Maia pawhin set khatna hloh zet chungin Kazakhstan nula Yulia Putintseva lakah 3-6 6-0 6-4 hnehna a sualchhuak.
June thla maia Birmingham Classic hnehtu Wimbledon semi-finalist Jelena Ostapenko pawhin Belgian Greet Minnen lakah 6-1 6-2 hnehna nuamsa a chang.
2021 Wimbledon runner-up Karolina Pliskova erawh first round paltlang zo loin amah aia ranking-a 206 zeta hniam Serbia player Natalija Stevanovic chuan 6-2 6-3-in a barakhaih.
He hmuna nikuma semi-final thleng German Tatjana Maria pawh opening round paltlang zo lo zingah telin, Romania player Sorana Cirstea chuan 6-1 2-6 6-3-in a hnawtchhuak.