Tlabung Khawthlangtuipuiah sangha man runpui siam tum

Fisheries department hotute, YMA Tlabung Branch leh an hnuaia No-Fishing Zone Sub Committee hruaitute chuan Nilaini khan karleha Community Fish Harvesting an buatsaih tur an thlirlawk.
Thutkhawm kaihruaitu Fisheries joint secretary Zonunthari chuan Tlabung khawtlangin YMA hmalaknaa tha taka lui dung an humhalh chu fakawm a tih thu a sawi a. Tualchhungmiten sangha man runpui chu sum leh paia an hlawkpui theihnan department-in a tul angin a ruahman pui thin tih a sawi.
Fisheries director Zonuntluangi pawhin, Mizorama lui hrang hrang chu sawrkar thuneihna leh enkawlna hnuaiah awm mah se, tha leh zung senga humhalhtu vantlangin hlawkna tel se tih chu an duh ber a ni a. Khawtlang hruaitute nen tangruala luia sangha awmze neia humhalh zel a tul tih a sawi a ni.
Thutkhawmah hian ni thum awh, April 28-30 chhunga Tlabunga neih tur Community Fish Harvesting hlawhtling taka buatsaih a nih theih dan tur leh, mipui tam zawkin an chhim theih dan tur sawiin ruahmanna an duang a. Nghakuai chiahtu zinga man lian ber, man hnem ber leh hmeichhe zinga sangha man tam ber bakah sangha mantu zinga naupang ber leh upa ber lawmman siam a ni ang.
Ruahman lawk ang chuan April 28-ah nghakuai hmangin, April 29-ah len den chi leh, April 30-ah len lian zar chi hmangin Khawthlangtuipui humhalh lai, ‘No-Fishing Zone’ a sangha man a ni dawn a, nghakuai khai duh tan pakhatah Rs. 100 zel, len deng duh tak Rs. 400 zel chawia inziah luh theih a ni ang. Hemi chhunga lena sangha man chu a man tlawm zawkin kg. ah Rs. 250 zela lei theih a ni anga, len hmanga man sangha kg.2 hnuailam erawh a mantuten la loin an chhuah lehnghal zel dawn a ni.
Fisheries Act hnuaiah sangha humhalhte hi kum thum dan zelah man runpui ang hi phal a ni a. Tlabungah hian kum 2022 khan hetiang program hi siam a ni tawh a, tun tumah hian Mizoram puma open event angin siam a ni ta a ni.