Tlawng tui a tlem chak Tui bill tisang dawn lo

Tlawng tui a tlem chak
Tui bill tisang dawn lo
PHE minister Prof Lalnilawma chuan Tlawng tui chu a kum telin a tlem tial tial tih a sawi a. Hetihlai hian department chuan tui bill tih san lam an la sawi lo hrim hrim tih a sawi.
Zirtawpnia Assembly Session-a zawhna chhangin PHE minister chuan department level-ah chuan tui bill tih san lam hi vawikhatmah an la sawi loa, tunhnaiah hnianghnar zawnga tui an pek theih tak avangin, tui dawn tam na na na chuan a meter a kal tam mai dawn a, sawrkarin tui bill tisang ta anga vawrh darh a ni ta mai zawk tih a sawi a ni.
Aizawl chawmtu tui lakna Tlawngah tui a tlem tial tial tih a sawi a. 2024 February 19-ah Tlawngah hian tui litre maktaduai (MLD) 110 a nih laiin, kumin February 19-ah chuan MLD 89.139 a ni a, MLA 20 velin a intlem hleih tawh a, tui hna tlem zel hi mutmawh hnarmawha neih a ngai hle tih a sawi.
Fur ruahtui tlak hmaa tih theih rang ber chu, tui awm ang ang engemawchen khuah a, lak phawt a ni tih a sawi a ni.
Tlawnga tui pump-na chu kum 2017 ah tuilianin a chim tawh a, 2024-ah tuiin chim lehin, 2017-a a chim ai hian feet 5 velin 2024-ah hian a chim sang tawh zawk tih PHE minister hian a sawi.
A vawi thumnaa tuilianin a chim leh chuan department thiam loh hulhual a nih tawh dawn avangin chief minister hnenah a thlen thuai a. A awmna ram sawn dawnin mimal ram te a nih tawh avangin senso a sang dawn lutuk a, tuna a awmna atangin metre 3 vela chawi san an tum ta tih a sawi. A chawi sanna atan hian cheng vaibelchhe 30 vel ngai tura chhut a ni a, SASCI atangin vbch. 11.81 an hmu a, a bak vbch. 18 dang hi an dil leh mek a, chumi hma chuan an sum hmuh hmasak hmang hian bul tan an tum tih a sawi a ni.
“Tunah hian GAWSS Phase-I atangin nitin tui litre maktaduai (MLD) 9.68, Phase-II atangin MLD 16, Phase-III atangin MLD 8.44, a vaiin MLD 34.12 vel a pump theih a. Thla khata vawi thum sem emaw kartin vawi khat sem emawna kan nei tawh a ni,” a ti.