February 5, Pathianni zan khan English Premier League ah inkhel pahnih a awm a. London club lian Tottenham chuan Harry Kane goal thun hmangin champion lai Manchester City an hneh. Kane hian club record thar a siam a, Tottenham tan goal thun hnem thar a ni. Inkhel dangah Nottingham Forrest chuan an mikhual Leeds United an hneh ve bawk.
-- Advertisement --
Spurs in Gunners tan hna tha an thawk
Tottenham Hotspurs khelmualah Tottenham in Manchester City an mikhual kha Arsenal in an hmelma lian Spurs an tan ber zan a ni hial ang. Inrinni zanah Everton lakah an tlawm vanga an hmahruaina der-thawng hman Gunners tan an hmelma Spurs in hna tha an thawhsak a, Arsenal elpui lian ber City hnehsak in, an hmelma club an nuihtir.
Tottenham muala lenglut Manchester City in chak an mamawh luatah ngai an awh lova, pressure sang tan an zo lo. City game mawi tak kha hmuh tur a awm lova, ball an chang tam thei lova, an khingpui lakah hlauhawm an siam tam thei lo bawk. Tihsual ngah em em City hi Tottenham in an chep ral a ni ber a, team dang tana hlauhawm em em Erling Haaland meuh pawh hlauhawm lova siamin, an thukru hneh hle. Inkhel hmuhnawm takah chak phu zawk Spurs in hnehna an chang a tih ngam.
Bul tan chhe tak City tlarhnung tihsual hremin Tottenham hian goal an thun thuai. Minute 15-naa lekah Harry Kane chuan Højbjerg siamsak tha tak chu awlsam taka pet goal in hmahruaina goal a thun nghal. Hma takah goal chhuah mahse an si phurh sut tur khawpin City an insiamtha thei lo. Hun tawp thlengin hlauhawm zawk chu Tottenham an ni reng a. Beh chang nei bawk mahse Tottenham nawr let a hlauhawm thei hle.
An muala khel tha tak Tottenham hian hun tawp thlengin an goal khat thun an humhim tluan a, goal thun belh bik lo mah se hnehna hlu tak changin, point thum an hmu. Champion lai City an hneh vangin Spurs hian champions league khelh phak beiseina an nei sang thar viau a, palinaa awm mek Newcastle United nen an inkarah point khat chiah a tlazep tawh.
Spurs in hma lam an pan laiin City champion beiseina a khawk ve thung. City hian Tottenham lakah point thum hmu se hmahruaitu Arsenal an phak lohna chu point hnih chiah a ni tawh dawn a, Gunners an nawr buai leh zual hle tura ngaih a ni. Arsenal nen an inkar an tizim thei lova, Arsenal hian game khata an khel tlem zawk bawk si vangin City manager Pep Guardiola chuan an tan champion ngaihtuah ngam a nih loh thu a sawi ta hial a ni.
Kane record thar
Manchester City laka chakna goal hlu tak thuntu Harry Kane chuan Tottenham record thar a siam a, Spurs tan goal thun hnem ber a ni. Kane hian Tottenham tan inelna hrang hrangah goal 267 a thung tling tawh a, Tottenham tana goal thun hnem ber ni thin Jimmy Greaves a record a khum ta nge nge. Tottenham tana goal thun hnem ber record thar siamtu Harry Kane hian goal 267 thun turin game 416 zet a mamawh a. Greave khan goal 266 thun turin game 379 chiah a mamawh ve thung.
Kum 29 mi Harry Kane hian English Premier League-ah goal 200 a thun tling tawh a. EPL ah goal 200 thun tling thei pathumna niin, amah aia goal thun hnem pahnih chiah an awm a, chungte chu goal 208 thun tawh Wayne Rooney leh goal 260 thun tawh Alan Shearer te an ni. Kane hian England tan goal thun hnem laka a khum tawh Rooney hi EPL ah pawh a khum leh thuai tura ngaih a ni.