Toyota Kirloskar-in sawrkar hnenah excavator pahnih pe

Toyota Kirloskar-in sawrkar
hnenah excavator pahnih pe
Toyota Kirloskar Motor Private Limited-in Road Safety & Disaster Management lama hman atan Mizoram sawrkar hnenah excavator pahnih an pe a, Thawhtanni khan chief minister Lalduhoma hnenah an hlan.
Chief minister chuan disaster management lama hman theih hmanraw to tham, tangkai bawk si an neih belh chu an lawm hle tih a sawi a. Toyota Kirloskar Company-in Aizawl traffic management tihchangtlunna tura an thilpek, Chapchar Kut senso tam tham tak an thawh leh Mizoram tana an luan chhuahna dang avangin lawmthu a hrilh.
Toyota Kirloskar country head, executive vice president Vikram Gulati chuan Mizoramin leilung chhiatna a tawh thin thu an hria a. Tih theih tam tak nei lo mah se, heng chhiatna a thlen palh changa chhanchhuah leh tanpui hna thawhna lama hman tur, an tha tichaktu tura an rin sawrkar pek tha an ti tih a sawi a ni.
Excavator kawlzuitu tur District Disaster Management Authority chairman pahnih – Aizawl bawrhsap Er Lalhriatpuia leh Serchhip bawrhsap Paul L Khuma te bakah Aizawl traffic management tihchangtlunna tura Toyota Kirloskar-in CSR atanga hmanrua an pek senior SP Aizawl Traffic Stephen Lalrinawma leh Aizawl Smart City Ltd CEO CC Lalchhuangkima ten thu an sawi bawk.