Trump-a chennaa silai nena luh tum kap hlum

On Feb 24, 2026 7 0

Trump-a chennaa silai nena luh tum kap hlum
US President Donald Trump-in, Florida-a Mar-a-Lago-a luh phal lohna china lut mipa ralthuam keng chu kah hlum a ni tih Secret Service-in an sawi.
Shotgun leh tuialhthei bur (can) nena lut hi an tihdin hnuah Secret Service agent leh Sheriff deputy-in an kap tih thuneituten an sawi.
Pathianni zing dar 01:30 (India-a chhun dar 12:00) vela thleng niin president hi Washington-a a awm lai a ni thung.
CBS chuan kah hlum tak hi Cameron, North Carolina-a mi, Austin T Martin niin a tar lang a. Inrinni khan a chhungte chuan a chin an hre lo tih an lo sawi tawh niin an tar lang bawk.
Engtin nge silai nen North Carolina atanga Florida thleng a inkhalh luh theih tih chhui mek a ni tih CBS hian a tar lang.
Secret Service thupuangtu, Anthony Guglielmi chuan agent-te hian ‘zing hma takah dan lova Mar-a-Lago-a luh phal lohva hung chin’ a lut tih hmuin an kap tih X-ah a tar lang.
Hmar lam gate-ah shotgun ni ngeia hriat leh tuialhthei bur kenga hmuh a ni a, thu pek zawm lova a awm avangin kah a ni ta niin Palm Beach County sheriff Ric Bradshaw chuan a sawi bawk.
A thil kente dah turin an ti a, a tuialhthei bur chu dahin a shotgun erawh kah tumin a lek kang niin a sawi a. “Hlauhawm hmeh mih nan agent-ten an kap ta a ni,” a ti.
Officer-te hian body camera an inbel vek a, an zingah hliam pawh an awm lo niin a sawi.
Bradshaw-a hian an kah hlum tak silai hi a in-load em tih a la hriat loh thu leh FBI nen an chhui zui mek thu a sawi.
Mar-a-Lago venhimna hi a khauh hle a, a pawnah Palm Beach sheriff-ten vengin a chhungah Secret Service agent-ten an veng leh a. A tlawhtute hi uluk takin a dap a, an car leh ip pawh ui leh metal detector hmanga endik vek zel an ni.
Trump-a hi thah tum leh beihna lo tawk tawh thin a ni a. July, 2024 khan Butler, Pensylvania-ah a beng ding lama kah hliam niin mi pakhat a thi a, pahnihin hliam an tuar bawk a. A kaptu, Matthew Crooks-a chu venhim hna thawktuten an kap hlum ve nghal a, a tih chhan erawh tun thlenga hriat a la ni lo.
Thla eng emaw zat hnuah West Palm Beach-a Trump International Golf Club-ah thing buk kara rifle-a an tin hmuh a ni leh a. A tintu hi tlanchhe hman mah se man zui a ni a, Ryan Routh-a niin tun thla tir khan dam chhung tang tura hrem a ni.