Trump-a chungah Thailand leh Combodia an lawm, an inkap zui zel thung

Trump-a chungah Thailand leh Combodia an lawm, an inkap zui zel thung
Thailand leh Cambodia chuan an inepna boruak kal mekah US President Donald Trump-a a inrawlh avanga an lawm thu an sawi ve ve a, hetih lai hian laipuia inkah an la chhunzawm.
Inrinni khan Trump-a hian Cambodia leh Thailand hruaitu ve ve biain ramria an indonaah inkahhai kalpui turin a nawr.
A Scottish golf course a tlawh tannaah US president hian Truth Social-ah ram pahnihte chuan ‘rang taka inbiaka inkahhai puang tur leh muanna a awm theihna tura inbiak an rem ti’ tih a tar lang.
Ram pahnihte hian a chungah lawm thu an sawi zui ve ve a. Cambodia hian inkahhai kalpui ngenna chu an pawm a, Thailand hian inbiak phawt tul an ti thung.
US president-in an hruaitute a biak hnuah hian Inrinni zan pawh khan ramri hrulah an la inkap zui zel.
Trump-a’n phone-a Thailand leh Cambodia prime minister a biak hian thil lawmawm lam sawi ve ve mah se indona mualah erawh thil a danglam phah lo.
Cambodia hian inkahhai rawtna an siam tawh a, Thailand aiin sipai an nei chak lo zawk a, Thai laipui leh thlawhnaten an kahna avangin tanhmun leh hmanrua an hloh nual tawh.
“Trump-a hnenah hian Cambodia chuan rang taka tiamkam awm lova ram pahnih sipaite inkahhaina tura rawtna ka pawm thu ka hrilh,” tiin Cambodian Prime Minister Hun Manet-a chuan phone-a an inbiak zawhah a sawi a, Trump-a inrawlhna chuan ‘sipai leh civil mi tam tak nunna a hum dawn’ tih a sawi bawk.
Thailand ve thung hian inkahhai chu tha an tih thu an sawi rualin a hmaa an thil phutte sawi turin Cambodia nena an inbiak phawt a tul tih an sawi thung.
Prime minister nihna chelh mektu, Phumtham Wechayachai-a chuan ‘President Trump-a’n min ngai pawimawh hi kan lawm a, Thailand hian a thuphungin inkahhai hi a pawm a. Hetih rual hian Thailand chuan Cambodian lamte chet dan a ngaichang reng’ tiin a sawi niin Thai foreign ministry-in thu a chhuah.
Ningani atanga an inbeihnaah hian sipai leh civil mi 33 vel an thi tawh a, ramri hrula awm Thai leh Cambodian sang tam tak baihvaiin an awm phah mek.
Trump-a hian sumdawnna thilah Cambodia leh Thailand chu dawr chhunzawm a tum a; mahse, ‘indo TAWP hmasak’ a phut.
US hian ram pahnih lakah hian tariff tihsan a tum a, an indawrnaa inremna thar a awm lo a nih chuan August 1 atang hian US-a Thailand leh Cambodia bungraw lut atanga chhiah lak chu 36%-ah tihsan a tum.
Indonaa Trump-a inrawlh hian eng nge a thlen dawn a la hriat chiah lo va, Zirtawpni zan kha chuan Thai Foreign Minister Maris Sangiampongsa chuan, “Ram dang an inrawlh tulna a awmin ka hre lo,” a ti.
Malaysian Prime Minister Anwar Ibrahim-a pawhin Thailand leh Cambodia chu inbe turin a lo rawt tawh a, hnawl a ni.
Thailand leh Cambodia hi kutthlaktu hmasaah an inpuh ve ve a. Thailand hian ramri hrula an sipaite dahte enthlain Cambodian sipaiten drone an thlawhtir tih a sawi a. Cambodia hian Thai sipaite hian an inremna bawhchhiain Khmer-Hindu temple an dai niin an puh ve thung.
Ram pahnih ramri hi kum 100 chuang kal tawha French-ten Cambodia an awpa ramri a rinsak atangin an buai tawh a ni.