Trump-a thu pekin Somalia-a IS firfiakte bei
Donald Trump-a chuan a sipaite chu thu pein Somalia-a Islamic State (IS) pawla mi beih dan ruahmantu hlun leh mi dangte chu thlawhna atanga kap turin a ti a, a tih angin beih an ni.
“Heng mi thattu, puka birute hi an awmna kan hria a, United States leh kan thawhpuite tiderthawngtute an ni,” tiin Trump-a hian social media-ah a tar lang.
“Kan kahna hian an chenna puk a tichhia a, mi firfak tam tak chu civil mite tina si lovin thah an ni,” a ti bawk.
Trump-a hian mi mal hming tumah a sawi lang lo va, a sawi ang hian an kap ngei em tih finfiahna pawh a awm rih lo.
President hian a thil tar lanah chuan, “ISIS leh American-te beitu tana thuchah chu, ‘KAN ZAWNG CHHUAK CHE U ANG A, KAN THAT ANG CHE U!’ tih hi a ni,” tiin a tawp a khar.
Defence Secretary Pete Hegseth-a’n thuchhuah a siamah chuan ‘kan hriat dan chuan thlawhna atanga kan kahnaah hian pawikhawihtu tam tak that an ni a, civil mi erawh tuartu an awm lo’ a ti.
Hegseth-a chuan he an beihna hian IS-in ‘firfiaka mi a beihna’ chu ‘a tihniam sawt dawn’ tih a sawi a, ‘United States hi mi firfiakte dap chhuaka dah tha turin a inring reng’ tih a lantir dawn bawk tih a sawi bawk.
Thlawhna atang hian Somalia hmar lama Golis tlangram an bei tih Hegseth-a hian a sawi bawk.
Trump-a chuan tun tuma an sipaite chetnaah hian sorkar hmasa a sawisel nghal a, US sipaite chuan IS mite hi kum tam tak a lo umzui tawh a; mahse, Joe Biden-a sorkar khan rang takin thu a pe lo va, an che chhuak lo niin a sawi.
US sipaite hian kum 2023 khan Biden-a thupekin IS hruaitu, Bilal al-Sudani leh a thuihhruai mi 10 chu Somalia hmar lam tlangrama puk kilkhawr takah an lo that tawh.
IS hi kum 2010 chho velah khan khawvelah an lian hman hle a, a bikin Syria leh Iraq-ah an tam zual a; mahse, tunah chuan an tlahniam tawh a, an awmna ber pawh Africa khawmualpui hmun hrang hrang a ni tawh.
IS hnuaia Somali branch hi kum 2015-a al-Qaeda-a inziak lut, Somalia-a firfiak pawl lian ber, al-Shabab atanga pengten an din a ni.
US Office of the Director of National Intelligence chuan Somalia-a IS-te hian tual chhung mite thil neih rawng taka chhuhsak an chung a, lian tham vak lova chet leh rawng tak taka mi beih an ching niin an sawi.
Trump-a thu pekin Somalia-a IS firfiakte bei
Get real time updates directly on you device, subscribe now.
Next Post