Pak sipai lalin sipai 18 leh firfiak 23 thihna tlawh
Pakistan Chief of Army Staff Gen Syed Asim Munir chuan a hma darkar 24 liam ta chhunga inbeihna thlenga venhim hna thawktu mi 18 leh mi firfiak 23 thihna nia sawi, Balochistan chu Inrinni khan a tlawh.
Army chief hian he venhim hna thawhnaa hotu sang leh intelligence hotute nen he province-a thil dinhmun leh hmalak ngaihna an sawiho niin Associated Press chuan a tar lang.
Army chief hi Balochistan Chief Minister Sarfraz Bugti leh Governor Sheikh Jaffar Khan Mandokhail te nen sipai thihte vuinaah telin Combined Military Hospital Quetta-ah hliam tuarte an kan nghal bawk.
“Heng mite hi tute pawh ni se, kan ramin a lo dang tura sipai chhuanawm tak a neihte hian an hneh zel ang,” tiin Gen Munir chuan a sawi.
Gen Munir-a hian firfiaka chetna bei tura sipai leh officer, Frontier Corps leh dan leh thupek kengkawhtu dangte huaisenna leh inpekna chu a fak a. Balochistan-a chengte tan himna leh thanna turin sipaite hian hma an la zel dawn tih a sawi bawk.
Inbeihna hi Pakistan chhimthlang lam, Balochistan province-a thleng a ni a. Sipaite chuan hmun hrang hrangah mi firfiak eng emaw zat an that tih an sawi.
Harnai district-a Inrinnia beihpui an thlakna pakhatah chuan mi firfiak 11 an that a, an tawmna thin tam tak an tichhe bawk.
Zirtawpni zan khan Mangocher-a Kalat-ah kawngpui dan tuma che mi firfiak 12 chu an that bawk.
“Darkar 24 liam ta chhungin Balochistan-a beihpui thlakna mi firfiak 23 thah an ni,” tiin sipaite chuan an sawi a. Beihpui hi an thlak chhunzawm zel a, ‘dawizep taka che thinte’ chu an umzui zel tih an sawi.
Hetih lai hian heng an thah tak firfiakte hi eng pawl mi nge an nih tih insawi an la awm lo.
Balochistan-ah hian Baloch mite tana ram hran ngiat niin tharumin an bei a, venhim hna thawktute leh province danga mite an bei thin a, tharum thawhna nasa takin a thleng thin.
Pakistan-a province lian ber a ni a, ram leilung pawh a hausa a; mahse, hmasawn lo leh changkang lo ber a ni thung.
Sorkar nen hian Tehreek-e-Taliban Pakistan pawl chuan inkahhai an puang reng thin a; mahse, hei hi tihtawp a nih tak avangin tharum thawhna a nasa zual hle.
-- Advertisement --
Nikum chhung khan venhim hna thawktu 685 thiin firfiaka chetna 444 a thleng a, kum tam tak chhunga Pakistan-a civil mi leh sipaiten kum khat chhunga firfiak chetna avanga thihna an tawh tam ber kum a ni.